Ўзбекистондаги реабилитация марказлари яшаш жойи бўлмаганларга вақтинчалик бошпанага айлантирилади
Бошпанасиз шахслар вақтинчалик бошпана ва ижтимоий тикланиш марказларига жойлаштирилиб, улар учун ҳужжатларни тиклаш, касбга ўқитиш ва ишга жойлаштириш бўйича индивидуал режа ишлаб чиқилади.
Президент Шавкат Мирзиёевга муайян яшаш жойига эга бўлмаган шахсларга ижтимоий хизматлар кўрсатиш тизимини такомиллаштиришга қаратилган янги таклифлар тақдим этилди.
Тақдимотда амалдаги реабилитация муассасаларини вақтинчалик бошпана ва ижтимоий тикланиш марказларига айлантириш режалаштирилаётгани маълум қилинди. Ҳозирда республика бўйича 726 ўринга мўлжалланган 11 та реабилитация маркази фаолият юритмоқда. Жорий йилнинг биринчи ярмида уларга 1,1 минг нафар шахс жойлаштирилган.
Янги тизимга кўра, бошпанасиз шахслар марказларга ўз мурожаати, “маҳалла еттилиги” тавсияси ёки ижтимоий ходим ҳамда профилактика инспектори кўмагида жойлаштирилади. Ҳар бир фуқаро учун индивидуал режа ишлаб чиқилиб, ҳужжатларини тиклаш, тиббий ва ижтимоий хизматлар кўрсатиш, касбга ўқитиш ҳамда ишга жойлаштириш чоралари белгиланади.
Шунингдек, марказларда бандликни қўллаб-қувватлаш бўлинмалари ташкил этилиши, тадбиркорларга бўш жойлар имтиёзли шартларда ижарага берилиши режалаштирилган. Бошпанасиз шахсларга касб-ҳунарга ўқиш учун ваучер ажратиш, уларни ижтимоий эҳтиёжманд тоифага киритиш ва улар учун иш ўринларини захиралаш ҳам таклиф этилган.
Бундан ташқари, нодавлат ташкилотларга давлат ижтимоий буюртмаларини жойлаштириш орқали бошпанасиз шахсларни вақтинчалик бошпана, иссиқ овқат ва кийим-бош билан таъминлаш қамровини кенгайтириш кўзда тутилмоқда.
