Андижон ва Қашқадарёда пора олаётган мансабдор мансабдорлар ушланди
Мансабдорлар фуқароларнинг масаласини ижобий ҳал қилиб бериш эвазига минглаб доллар талаб қилган.
Андижон вилоятида "Андижон сув таъминоти" АЖнинг туман филиалларидан бирининг бошлиғи ўз хизмат мавқеидан фойдаланиб, мансабдор танишлари орқали фуқаронинг янги қурилган хонадонига оқава сув тармоғи тортиш ва канализация насосини ўрнатиш учун рухсат олиб беришни ваъда қилган. Бунинг эвазига у 1983 йилда туғилган фуқародан 8,5 минг АҚШ доллари талаб қилган.
Давлат хавфсизлик хизмати, Бош прокуратура ҳузуридаги Департамент ва Ички ишлар органлари ходимлари ҳамкорлигида ўтказилган тезкор тадбирда ушбу мансабдор сўралган пул маблағини учинчи шахс орқали олган вақтида унинг ноқонуний ҳаракатига чек қўйилган.
Қашқадарё вилоятида аниқланган яна бир ҳолатда эса ОИТСга қарши курашиш марказининг туманлардан биридаги ОИВ диагностика лабораторияси лаборанти фуқарога нисбатан тайинланган экспертиза хулосасини мансабдор танишлари орқали унинг фойдасига ижобий ҳал қилиб беришни ваъда қилган. Ушбу хизмат эвазига у 3 минг АҚШ доллари олган вақтида Давлат хавфсизлик хизмати ва Бош прокуратура ҳузуридаги Департамент ходимлари томонидан ашёвий далиллар билан ушланган.
Шундан сўнг тезкор тадбир давом эттирилиб, лаборантдан 2,5 минг АҚШ долларини олган вақтида Республика суд-тиббий экспертиза илмий-амалий марказининг туман бўлими бошлиғи ҳам қўлга олинган.
Ҳар икки ҳолат юзасидан айбдорларга нисбатан жиноят ишлари қўзғатилиб, тергов ҳаракатлари олиб борилмоқда
