Қозоғистонда хорижликлар учун пуллик электрон кириш рухсатномаси жорий этилиши мумкин
Тўловлар рақамли инфратузилмани ривожлантириш ва шахсий маълумотларни ҳимоя қилиш харажатларини қоплашга йўналтирилади.
Қозоғистон Ички ишлар вазирлиги хорижликлар учун мамлакатга пуллик электрон кириш рухсатномаларини жорий этишни назарда тутувчи ҳукумат қарори лойиҳасини ишлаб чиқди. Ҳужжат “Очиқ норматив-ҳуқуқий ҳужжатлар” порталида жамоатчилик муҳокамасига қўйилган, дея хабар бермоқда Meduza.
Қарор лойиҳасига кўра, тўловлар рақамли инфратузилмани ривожлантириш ва шахсий маълумотларни ҳимоя қилиш харажатларини қоплашга йўналтирилади. Бироқ электрон рухсатнома нархи ҳамда янги тартиб қайси тоифадаги хорижликларга татбиқ этилиши ҳозирча очиқланмаган.
Маълум қилинишича, пуллик электрон кириш рухсатномаларини 2026 йил август–декабрь ойларида босқичма-босқич жорий этиш режалаштирилган.
Лойиҳа президент Қосим-Жомарт Тўқаевнинг миграция назоратини модернизация қилиш ва рақамлаштириш бўйича топшириғи ижроси доирасида ишлаб чиқилган. Жорий йил июнь ойида президент электрон кириш рухсатномаси тизимини жорий этишга ҳуқуқий асос яратган қонунни имзолаган эди.
Қарор лойиҳаси 17 августга қадар жамоатчилик муҳокамасида бўлади.
