Шаҳрисабз тумани ҳокимининг фуқаро хонадонидаги хатти-ҳаракатлари юзасидан хизмат текшируви сўралди
Ҳоким фуқаронинг яшаш шароитини танқид қилгани ва жарима қўллаш бўйича топшириқ бергани акс этган видео тарқалди. Ҳолат юзасидан Коррупцияга қарши курашиш агентлиги вилоят ҳокимлигига хизмат текшируви ўтказиш бўйича тақдимнома киритди.
Ижтимоий тармоқларда Қашқадарё вилоятининг Шаҳрисабз тумани ҳокими Самад Ҳасановнинг маҳаллий аҳоли хонадонига кириб, фуқаро билан мулоқоти акс этган видеотасвир кенг муҳокамаларга сабаб бўлди.
Видеода ҳоким хонадон эгасига яшаш жойини озода сақлаш бўйича танбеҳ бериб, уйнинг санитария ҳолатини танқид қилгани, тасвирларни маҳалла Теlegram гуруҳига жойлаштиришини айтгани акс этган. Шунингдек, у мазкур хонадондан "ҳеч ким келин олмаслиги" ҳақида фикр билдирган, фуқаронинг туш пайти дам олаётганини танқид қилган ҳамда масъулларга хонадон эгаларига жарима қўллаш бўйича топшириқ бергани кўринади.
Видеода маҳалла раиси сифатида таништирилган аёл ҳам фуқарони уй ва ҳовлини тоза сақламагани учун танқид қилган.
Ҳолат юзасидан Коррупцияга қарши курашиш агентлиги муносабат билдириб, ҳар қандай даражадаги раҳбар фуқаролар билан мулоқотда давлат фуқаролик хизматчиларининг одоб-ахлоқ қоидаларига қатъий риоя қилиши шартлигини эслатди.
Агентлик таъкидлашича, фуқароларнинг шахсий ҳаёти дахлсизлигини бузиш, уларнинг шаъни ва қадр-қимматини камситиш, шунингдек, асоссиз маъмурий босим ўтказиш амалдаги қонунчилик ва этика меъёрларига зид ҳисобланади.
Маълум қилинишича, Агентлик ўз ваколати доирасида Қашқадарё вилояти ҳокимлигига мазкур ҳолат юзасидан қонунчиликда белгиланган тартибда хизмат текшируви ўтказиш ҳамда ҳуқуқий баҳо бериш бўйича тақдимнома киритган.
