Ўзбекистонда туғилган Рустем Умеров Украина Ташқи разведка хизматига раҳбар бўлди
У Самарқанд вилоятининг Булунғур туманида қрим-татар оиласида туғилган.
Украина президенти Владимир Зеленский Ўзбекистонда туғилган Рустем Умеровни Украина Ташқи разведка хизмати раҳбари этиб тайинлади.
Рустем Умеров бунгача Украина Миллий хавфсизлик ва мудофаа кенгаши котиби лавозимида фаолият юритган. Янги лавозимда у мамлакатнинг разведка фаолиятини бошқариш билан бирга, халқаро ҳамкорлар билан мудофаа ва хавфсизлик соҳасидаги музокараларни ҳам мувофиқлаштиради.
Президент Зеленскийнинг таъкидлашича, Умеров “Дронлар битими” ташаббуси доирасидаги ҳамкорликни давом эттиради. Мазкур ташаббус орқали Украина мудофаа саноати учун узоқ муддатли молиялаштиришни таъминлаш ва ҳамкор давлатлар билан замонавий мудофаа технологиялари бўйича ҳамкорликни кенгайтириш режалаштирилган.
Маълум қилинишича, ҳозиргача ушбу лойиҳа бўйича тўққизта давлат билан келишув имзоланган, яна 15 та давлат билан музокаралар давом этмоқда.
Рустем Умеров 1982 йилда Самарқанд вилоятининг Булунғур туманида қрим-татар оиласида туғилган. У аввал Россия-Украина уруши бўйича халқаро музокараларда фаол иштирок этган ҳамда АҚШ ва бошқа ҳамкор давлатлар билан олиб борилган музокараларда Украина делегациясига раҳбарлик қилган.
