Энди экологик экспертиза бошқача ишлайди: Вазирлар Маҳкамасининг 2026 йил 11 майдаги 234-сон қарори нималарни ўзгартирди?
Янги тартиб лойиҳаларни экологик хавфига қараб баҳолаш, бюрократияни қисқартириш ва хизматлар шаффофлигини оширишни назарда тутади.
2026 йил 5 август куни Экология ва иқлим ўзгариши миллий қўмитаси ҳузуридаги Давлат экологик экспертизаси маркази томонидан Вазирлар Маҳкамасининг 2026-йил 11 майдаги 234-сон қарорининг мазмун-моҳияти ва амалий аҳамиятига бағишланган матбуот анжумани бўлиб ўтди.
Хўш, янги қарор билан нималар ўзгарди?
Мазкур қарор асосида атроф-муҳитга таъсирни баҳолаш тизими халқаро стандарт ва ёндашувлар асосида такомиллаштирилди. Эндиликда:
- лойиҳалар экологик хавф даражасига қараб тоифаларга ажратилиб баҳоланади;
- скрининг ва скопинг босқичлари жорий этилди;
- углерод изи ҳамда иссиқхона газлари эмиссиясини баҳолаш талаби белгиланди;
- жамоатчилик иштироки кенгайтирилди;
- лойиҳа ишлаб чиқувчиларнинг масъулияти кучайтирилди.
Шунингдек тадбиркорлар учун бир нечта қулайликлар яратилмоқда:
- экологик экспертиза хизматларига электрон мурожаат қилиш;
- лойиҳа тоифасига мос, мутаносиб талаблар асосида баҳолаш;
- жараёнларнинг янада шаффоф ва тушунарли бўлиши;
- очиқ рейтинг тизими орқали ишончли лойиҳа ишлаб чиқувчиларни танлаш имконияти;
- ортиқча вақт ва харажатларнинг олдини олиш.
Янги тизимнинг асосий мақсади тадбиркорлар учун қўшимча чекловлар яратиш эмас, балки экологик хавфларни олдиндан баҳолаш, бюрократик тартиб-таомилларни соддалаштириш, давлат хизматларининг шаффофлигини ошириш ҳамда фуқаролар манфаатларини ҳимоя қилишдан иборат.
Вазирлар Маҳкамасининг 2026 йил 11 майдаги 234-сон қарори Ўзбекистонда экологик экспертиза ва атроф-муҳитга таъсирни баҳолаш тизимини замонавий босқичга олиб чиқишга хизмат қилади. Мазкур ислоҳот иқтисодий ривожланиш ва экологик барқарорлик ўртасидаги мувозанатни мустаҳкамлашга қаратилган.
Энди экологик экспертиза шунчаки рухсат бериш механизми эмас — у экологик хавфларни олдиндан бошқаришнинг замонавий тизимига айланмоқда.
