Сирдарёда фарзандини кийим илгич билан урган она 3 суткага қамалди
Аёл фарзанди мактабдаги тўгаракка бормасдан кўчада ўйнаб юрганидан жаҳли чиққан.
Сирдарё вилоятида 10 ёшли фарзандини мактаб тўгарагига бормагани учун урган аёлга нисбатан маъмурий жазо тайинланди. Бу ҳақда "Мillar" дастурида хабар берилди.
Суд ҳужжатларига кўра, аёл фарзанди мактабдаги тўгаракка бормасдан кўчада ўйнаб юрганидан ғазабланиб, қўлидаги кийим илгич билан унинг боши ва танасининг бошқа қисмларига урган. Суд-тиббий экспертизаси хулосасига кўра, болага соғлиғининг қисқа муддатли бузилишига сабаб бўлмаган енгил тан жароҳати етказилган.
Суд мажлисида аёл қилмишидан пушаймон эканини билдириб, ўзига енгиллик беришни сўради. Жабрланувчининг қонуний вакили — боланинг отаси ҳам воқеадан ишдан қайтгач хабар топганини, турмуш ўртоғига нисбатан даъвоси йўқлигини ва оиланинг бирлигини инобатга олиб, унга нисбатан енгиллик қўллашни сўради.
Суд аёлни Маъмурий жавобгарлик тўғрисидаги кодекснинг 59¹-2-моддаси иккинчи қисми билан айбдор деб топиб, унга 3 сутка маъмурий қамоқ жазосини тайинлади.
Шунингдек, унга келгусида шу каби қилмишларни такрорласа, жиноий жавобгарликка тортилиши мумкинлиги ҳақида тушунтириш берилди.
