Россияда хорижликлар сони бир йилда 8,6 фоизга камайди

Россия ҳудудида яшаётган хорижий фуқаролар сони 2025 йил якунларига кўра 8,6 фоизга қисқариб, 5,7 миллион кишини ташкил этди. Бу ҳақда Россия Ички ишлар вазирлиги Миграция хизматига таяниб, “Ведомости” хабар берди.

 

Расмий маълумотларга кўра, мамлакатдаги вояга етмаган хорижликлар сони 24,5 фоизга камайиб, 591,3 минг нафарга, хорижлик аёллар сони эса 7,6 фоизга қисқариб, 1,7 миллион нафарга етган.

 

Шунингдек, хорижий фуқароларга берилган вақтинчалик яшаш рухсатномалари сони 31 304 тани ташкил этиб, бир йил аввалгига нисбатан қарийб учдан бир қисмга камайган. Доимий яшаш гувоҳномалари сони 27,3 фоизга қисқариб, 156 229 тага, Россия фуқаролигини олган хорижликлар сони эса 27,1 фоизга камайиб, 152,4 минг нафарга тушган.

 

Россия ИИВ маълумотига кўра, назорат қилинадиган шахслар реестрига 850 мингдан ортиқ ноқонуний мигрант киритилган. Мазкур реестрга киритилган шахсларнинг амалдаги қонунчиликка мувофиқ айрим ҳуқуқлари чекланган.

 

Бироқ ҳисоботда қонуний меҳнат миграцияси бўйича ижобий ўсиш ҳам қайд этилган. Хусусан, патент ёки ишлаш рухсатномаси асосида фаолият юритаётган хорижий фуқаролар билан тузилган меҳнат ва фуқаролик-ҳуқуқий шартномалар тўғрисидаги хабарномалар сони мос равишда 25,9 фоиз ва 44,5 фоизга ошган.

 

Россия президенти Владимир Путин 2025 йил октябрь ойида 2026–2030 йилларга мўлжалланган миграция сиёсати концепциясини тасдиқлаган. Ҳужжат ноқонуний миграцияни камайтириш, миграция билан боғлиқ ҳуқуқбузарликларнинг олдини олиш ва иқтисодиёт учун малакали хорижий мутахассисларни жалб этишни асосий устувор йўналишлар сифатида белгилайди.