Трамп Вэнсни ўз вориси сифатида кўрмоқда — WP
Трамп шу пайтгача омма олдида Жей Ди Вэнс ва давлат котиби Марко Рубио ўртасида аниқ танлов қилмаганди.
АҚШ президенти Доналд Трамп Республикачилар партияси ҳомийларига вице-президент Жей Ди Вэнсни 2028-йилги президентлик сайловида қўллаб-қувватлаш ниятида эканини айтди. Бу ҳақда The Washington Post'га таяниб, Anadolu хабар берди.
Нашр маълумотига кўра, Трамп тахминан икки ҳафта аввал Оқ уйда ҳомийлар билан учрашувда: "Охир-оқибат, биз Жей Дини сайлашимиз керак", деган.
Қайд этилишича, Трамп шу пайтгача омма олдида Жей Ди Вэнс ва давлат котиби Марко Рубио ўртасида аниқ танлов қилмаган. У ҳар икки сиёсатчини мақтаб келган ва ўзининг афзал вориси кимлигини очиқламаган.
Шунга қарамай, манбалардан бири Трамп хусусий суҳбатларда Вэнсни ўзидан кейин Республикачилар партиясига етакчилик қиладиган сиёсатчи сифатида кўраётганини айтган. Бироқ бошқа маслаҳатчилар президент ҳали якуний қарорга келмаганини ва фикрини ўзгартириши мумкинлигини билдирган.
Ҳозирча Жей Ди Вэнс 2028-йилги президентлик сайловида иштирок этишини расман эълон қилмаган. The Washington Post'га кўра, у бу масалада кейинроқ қарор қабул қилиши кутилмоқда.
