Украинанинг АҚШдаги собиқ элчиси ноқонуний бойлик орттиришда гумон қилинмоқда
Олга Стефанишина қарийб 310 минг долларлик мол-мулкни яширганликда ва ноқонуний бойлик орттирганликда гумонланмоқда. Дипломат айбловларни рад этган.
Украинанинг АҚШдаги собиқ элчиси Олга Стефанишина ноқонуний бойлик орттириш ва мол-мулкини декларация қилмасликда гумон қилинмоқда. Бу ҳақда Украина ҳуқуқни муҳофаза қилувчи органларига таяниб, Reuters хабар берди.
Прокуратура маълумотига кўра, Стефанишина 2024 йил бошидан 2025 йил ўрталаригача эгаллаб турган лавозимида умумий қиймати қарийб 310 минг АҚШ долларига тенг бўлган икки хонадон ва бошқа активларни декларацияда кўрсатмаган. Тергов органлари ушбу мол-мулкни унинг расмий даромади ҳисобига сотиб олиш имкони бўлмаганини таъкидламоқда.
Украина қонунчилигига мувофиқ, расмийлар гумонланувчининг исмини ошкор қилмаган. Бироқ улар гап АҚШдаги собиқ элчи лавозимида ишлаган шахс ҳақида кетаётганини билдирган.
Олга Стефанишина эса Facebook'даги саҳифасида айбловларни рад этиб, яширадиган ҳеч нарсаси йўқлигини маълум қилган.
Стефанишина шу ҳафта бошида Президент Володимир Зеленский томонидан элчилик лавозимидан озод этилган. Унинг истеъфоси Украина ҳукуматидаги сўнгги кадрлар алмашинуви фонида юз берди. Аввалроқ мамлакат бош вазири ва мудофаа вазири ҳам лавозимидан кетганди.
