Ўзбекистон туризм ўсиши бўйича Марказий Осиёда етакчига айланди — WTTC
Мамлакат туризм хизматлари экспортидан 4,8 миллиард доллар даромад олди. Бу минтақа кўрсаткичининг ярмига тенг.
Жаҳон сайёҳлик ва туризм кенгаши (WTTC)нинг "Тravel & Tourism Economic Impact Research 2026" ҳисоботига кўра, 2025 йилда Марказий Осиё туризм ўсиш суръатлари бўйича дунёнинг энг тез ривожланаётган минтақаси бўлди. Ҳисоботда Ўзбекистон минтақа давлатлари орасида асосий туризм кўрсаткичлари бўйича биринчи ўринни эгаллагани қайд этилган.
WTTC дунёни 13 та йирик минтақага ажратган ҳолда таҳлил олиб боради. Ҳисоботга кўра, 2025 йилда Марказий Осиёда туризмнинг ялпи ички маҳсулотга умумий ҳиссаси 17,7 фоизга, тўғридан-тўғри ҳиссаси эса 19,6 фоизга ошган.
Шунингдек, минтақада туризм хизматлари экспорти 9,9 миллиард АҚШ долларига етиб, бир йил ичида 26,4 фоизга ўсган. Мазкур кўрсаткичнинг қарийб ярми Ўзбекистон ҳиссасига тўғри келади. Ҳисоботда қайд этилишича, 2025 йилда мамлакат 4,8 миллиард долларлик туризм хизматларини экспорт қилган.
WTTC маълумотларига кўра, Марказий Осиё аҳолиси орасида энг оммабоп саёҳат йўналиши ҳам Ўзбекистон бўлган. Минтақа сайёҳларининг 25 фоизи Ўзбекистонни танлаган бўлса, ундан кейинги ўринларни Қозоғистон (23 фоиз), Қирғизистон (18 фоиз), Россия (16 фоиз) ва Туркия (6 фоиз) эгаллаган.
Ташкилот Ўзбекистоннинг етакчи ўринни эгаллашини мамлакатнинг бой тарихий-маданий мероси ҳамда минтақавий сайёҳлар учун юқори жозибадорлиги билан изоҳлаган. Ҳисоботда Марказий Осиёда ягона туристик маконни шакллантириш учун катта салоҳият мавжудлиги, чегараларни соддалаштириш, транспорт ва авиақатновларни ривожлантириш ҳамда қўшма туризм маршрутлари халқаро сайёҳлар оқимини янада оширишга хизмат қилаётгани таъкидланган.
Ҳисоботга кўра, 2025 йилда туризм соҳасидаги харажатларнинг 64,3 фоизи хорижий сайёҳлар, 35,7 фоизи эса ички сайёҳлар ҳиссасига тўғри келган. Хорижий сайёҳлар харажатларининг 84,5 фоизи дам олиш, 15,5 фоизи эса бизнес мақсадларида амалга оширилган.
WTTC прогнозига кўра, 2036 йилга бориб туризмнинг Марказий Осиё иқтисодиётига қўшадиган умумий ҳиссаси 29,7 миллиард АҚШ долларига етиши кутилмоқда.
