Афғонистонда ҳар уч кишидан бири очлик хавфи остида

 

БМТнинг Жаҳон озиқ-овқат дастури (WFP) Афғонистондаги озиқ-овқат инқирози кучаяётганидан огоҳлантирди. Ташкилот маълумотларига кўра, мамлакатда 14 миллиондан ортиқ киши, яъни аҳолининг қарийб учдан бир қисми жиддий озиқ-овқат хавфсизлиги муаммосига дуч келмоқда.

 

WFPнинг Афғонистон бўйича директори Жон Илиффнинг маълум қилишича, мамлакатнинг 34 вилоятидан 12 тасида болалар орасида ўткир тўйиб овқатланмасликнинг жуда юқори даражаси қайд этилган. Энг оғир ҳолатларнинг қарийб 80 фоизи икки ёшгача бўлган болаларга тўғри келмоқда.

 

Ташкилот вазиятнинг ёмонлашишига ишсизликнинг ортиши, озиқ-овқат нархларининг кўтарилиши, савдо йўлларидаги узилишлар ҳамда қўшни давлатлардан афғон фуқароларининг мажбурий қайтарилишини асосий омиллар сифатида кўрсатмоқда.

 

WFP маълумотларига кўра, сўнгги йилларда қарийб 6 миллион афғон қўшни мамлакатлардан қайтишга мажбур бўлган. Бу эса мамлакатдаги озиқ-овқат ва бандлик билан боғлиқ муаммоларга қўшимча босим яратган.

 

Молиялаштиришнинг қисқариши сабабли ташкилот озиқ-овқат ёрдамини камайтиришга ва мавжуд ресурсларни энг оғир ҳолатларга йўналтиришга мажбур бўлган. Тўйиб овқатланмасликнинг олдини олишга мўлжалланган махсус озиқ-овқат маҳсулотларини етказиб бериш эса 2025 йил май ойида тўхтатилган.

 

WFPнинг ҳисоб-китобларига кўра, Афғонистондаги озиқ-овқат эҳтиёжларини қоплаш учун йил давомида қарийб 900 миллион доллар маблағ зарур. Ташкилот келгуси олти ойда мамлакатнинг энг долзарб озиқ-овқат эҳтиёжларини қондириш учун яна 500 миллион доллар маблағ кераклигини билдирган.

 

WFP UNICEF билан ҳамкорликда беш ёшгача бўлган тўйиб овқатланмаётган болалар, шунингдек, ҳомиладор ва эмизикли аёлларга ёрдам кўрсатиш бўйича дастурларни амалга оширмоқда.

 

Ташкилот донор давлатларни Афғонистондаги гуманитар инқироз оқибатларини юмшатиш учун молиявий ёрдамни оширишга чақирмоқда.