БАА Эронни ADNOC танкерига Ҳормуз бўғозида ракета билан зарба беришда айблади

Бирлашган Араб Амирликлари Эронни Абу-Даби миллий нефть компаниясига (ADNOC) тегишли танкерга Ҳормуз бўғозидан ўтаётган вақтда ракета билан зарба берганликда айблади. Ҳодиса оқибатида қурбонлар борлиги ҳақида маълумот берилмади. Бу ҳақда Al Jazeera хабар берди.

 

БАА Ташқи ишлар вазирлиги маълум қилишича, танкер 8 август куни тонгда стратегик сув йўлидан ўтаётган пайтда нишонга олинган. Абу-Даби ҳужумни Эрон Ислом инқилоби қўриқчилари корпуси томонидан содир этилган “қароқчилик ҳаракати” деб баҳолади.

 

БАА Теҳрондан ҳужумларни тўхтатиш ҳамда Ҳормуз бўғозини тўлиқ ва ҳеч қандай шартларсиз очишни талаб қилди. Вазирлик сув йўлидан босим ёки иқтисодий шантаж воситаси сифатида фойдаланиш минтақавий барқарорлик ва глобал энергетика хавфсизлигига таҳдид солишини билдирди.

 

ADNOC ҳам кемаларидан бири бўғозни кесиб ўтаётган пайтда ракета билан нишонга олинганини тасдиқлади. Компания кемага етган зарар ёки ҳужум вақтида унинг аниқ жойлашуви ҳақида маълумот бермади.

 

ADNOC жума куни можаро бошланганидан буён бўғоз орқали ўтаётган 15 та кемасига ракета ва дронлар билан ҳужум қилинганини маълум қилган. Уларнинг учтаси шу ҳафта нишонга олинган. Ҳужумлар оқибатида бир экипаж аъзоси ҳалок бўлган, 20 нафари яраланган. Компания ушбу ҳужумлар учун жавобгарларни очиқламаган.

 

Форс кўрфази ҳамкорлик кенгаши бош котиби Жассим Муҳаммад ал-Будайвий ҳужумни “хавфли ва номақбул кескинлашув” деб атади ҳамда халқаро ҳамжамиятни денгиз қатновини ҳимоя қилиш чораларини кўришга чақирди.

 

Қатар Ҳормуз бўғозидан босим воситаси сифатида фойдаланишга қарши чиқиб, сув йўлини ҳеч қандай шартсиз очишга чақирди.

 

Саудия Арабистони танкерга ҳужумни кескин қоралаб, Эроннинг бундай ҳаракатлари халқаро ҳуқуқ ва БМТ Хавфсизлик кенгашининг 2817-резолюциясини жиддий бузишини билдирди. Ар-Риёд Теҳронни ҳужумлар оқибатлари учун жавобгар деб ҳисоблашини маълум қилди.

 

Иордания ҳам ҳужумни халқаро ҳуқуқнинг очиқдан-очиқ бузилиши деб баҳолаб, БААни қўллаб-қувватлашини билдирди.

 

Мазкур воқеа Ҳормуз бўғози атрофидаги кескинликни янада кучайтирди. БАА ва Форс кўрфазидаги бошқа давлатлар стратегик сув йўлининг халқаро кемалар қатнови учун очиқ қолишини талаб қилмоқда.