Россиянинг яна 11 ҳудудида мигрантлар учун “Амина” иловаси мажбурий бўлади
"Амина” мобил иловаси ишлатмаган мигрант миграция режимини бузган деб ҳисобланиб, мамлакатдан чиқариб юборилиши мумкин.
Россиянинг 11 ҳудудида мигрантларнинг мамлакатга кириши ва ҳудуд ичидаги ҳаракатини назорат қилувчи “Амина” мобил иловаси жорий этилади. Бу ҳақда Москва мэри Сергей Собянин ТАСС бош директори Андрей Кондрашовга берган интервьюсида маълум қилди.
“Амина” тизими Россияга ишлаш учун келадиган визасиз давлатлар фуқароларининг миграция ҳисобини юритиш ва ҳаракатланишини рақамли назорат қилиш учун ишлаб чиқилган. Илова орқали мигрантнинг геолокацияси Ички ишлар вазирлигига узатилади, шунингдек, унинг амалдаги жойлашуви декларация қилинган манзилга мос келиши автоматик текширилади.
Собяниннинг айтишича, мигрантлар Россия чегарасидан ўтаётганда бармоқ излари ва рақамли фотосуратларини топширади. Ушбу биометрик маълумотлар асосида мамлакатга кириши тақиқланган ёки чегарада ушланиши керак бўлган ҳуқуқбузарлар аниқланади.
“Амина” тизими дастлаб Москва ва Москва вилоятида жорий этилган. Эндиликда у яна 11 та ҳудуддаги йирик транспорт, хусусан, авиация узелларида қўлланади.
Собянин, шунингдек, мигрантнинг телефонида “Амина” иловаси ишламаса, бу миграция режими бузилиши сифатида баҳоланиши ва шахс мамлакатдан чиқариб юборилиши мумкинлигини айтди.
Бундан ташқари, Россияда мигрантларга патент бериш жараёнида генетик маълумотлар ҳам тўпланаётгани маълум қилинди. Собяниннинг таъкидлашича, бу маълумотлардан илгари содир этилган жиноятларни очишда фойдаланилмоқда.
Москва мэри янги технологиялар, жумладан, видеокузатув, сунъий интеллект ва юзни аниқлаш тизимлари пойтахтда жиноятчиликка қарши курашни кучайтирганини таъкидлади.
