Колумбияда 7,4 магнитудали зилзила оқибатида камида 82 киши ҳалок бўлди
Зилзила Чоко провинциясида 107 километр чуқурликда қайд этилган ва мамлакатнинг бир қатор йирик шаҳарларида ҳам сезилган.
Колумбиянинг ғарбий қисмида 7,4 магнитудали кучли зилзила содир бўлиб, камида 82 киши ҳалок бўлди. Табиий офат оқибатида бир неча шаҳарда бинолар қулаган, айрим одамлар вайроналар остида қолган. Бу ҳақда Reuters хабар берди.
АҚШ Геология хизмати маълумотларига кўра, зилзила душанба куни эрта тонгда Тинч океани соҳилидаги Чоко провинциясида, Сан-Хосе-дел-Палмар шаҳри яқинида 107 километр чуқурликда қайд этилган. Зилзила мамлакатнинг йирик шаҳарларида ҳам сезилган.
Энг кўп қурбонлар ғарбдаги Рисаралда провинциясида қайд этилган. Вилоят губернатори Хуан Диэго Патинонинг маълум қилишича, ҳудудда 42 киши ҳалок бўлган.
Колумбиянинг йирик шаҳарларидан бири Кали ҳам зилзиладан жиддий зарар кўрган. Шаҳар мэри Алехандро Эдернинг айтишича, камида 30 та бино қулаган, қутқарувчилар эса уларнинг 10 тасида иш олиб бормоқда. Ҳозирча шаҳардаги қурбонлар сони расман тасдиқланмаган.
Провинция пойтахти Перейрада ҳам бинолар қулаган. Манизалес шаҳридаги неоготик собор минораларидан бирининг юқори қисми ҳам зилзила оқибатида қулаб тушган.
Зилзила марказига энг яқин Чоко провинцияси губернатори Нубиа Каролина Кордоба-Кури Кивдо шаҳрида қурбонлар, ўнлаб жабрланганлар ва катта вайронагарчиликлар қайд этилганини билдирган. Аҳоли такрорий зилзилалар эҳтимолидан огоҳлантирилган.
Қутқарув ишлари давом этмоқда. Қурбонлар ва вайронагарчиликлар сони ортиши мумкин.
