Қозоғистон Украина бўйича музокаралар ўтказиш учун ўз ҳудудини таклиф қилди
Москва Остонанинг можарони тинч йўл билан ҳал этишга қаратилган саъй-ҳаракатларини юқори баҳоламоқда.
Қозоғистон Украина атрофидаги вазиятни тинч йўл билан ҳал этиш бўйича музокаралар ўтказиш учун ўз ҳудудини бир неча бор платформа сифатида таклиф қилган. Россия томони Остона ташаббусини юқори баҳолаётганини маълум қилган.
Бу ҳақда Россия ташқи ишлар вазири ўринбосари Михаил Галузин ТАСС агентлигига берган интервьюсида маълум қилган.
Галузиннинг таъкидлашича, Қозоғистон Россиянинг яқин ҳамкори ва иттифоқчиси ҳисобланади. Унинг сўзларига кўра, Москва Остона раҳбариятининг Украина атрофидаги вазиятга эътибор қаратаётгани ҳамда можарони имкон қадар тез ва тинч йўл билан ҳал этишга қаратилган саъй-ҳаракатларини қадрлайди.
“Қозоғистон бизнинг энг яқин ҳамкоримиз ва иттифоқчимиз бўлиб, биз у билан кўплаб стратегик масалалар бўйича ишончли мулоқот олиб борамиз”, — деган Галузин.
Дипломат Қозоғистон Украина можаросини тинч йўл билан ҳал этиш бўйича музокаралар учун ўз платформасини бир неча бор таклиф қилганини таъкидлаган.
Унинг қайд этишича, Остона Украина атрофидаги вазият юзасидан мулоқот ва музокаралар учун ўз ҳудудидан фойдаланиш имкониятини тақдим этишга тайёрлигини билдирган.
