Татаристондаги дрон ҳужумида 7 нафар Ўзбекистон фуқароси ҳалок бўлди
Ҳужум оқибатида ҳалок бўлганлар орасида Тожикистон фуқаролари ҳам борлиги хабар қилинган.
Россиянинг Татаристон Республикаси Нижнекамск шаҳрида 10 август куни қатор объектларга учувчисиз учиш аппаратлари орқали ҳужум уюштирилиши оқибатида 7 нафар Ўзбекистон фуқароси ҳалок бўлди.
Ўзбекистоннинг Қозон шаҳридаги Бош консулхонаси маълумотига кўра, Татаристон Республикасининг ҳуқуқни муҳофаза қилувчи идоралари ҳодиса оқибатида жами 13 киши ҳалок бўлгани, 39 киши турли даражада жароҳат олганини маълум қилган.
Бош консулхона мазкур ҳолатни назоратга олган. Ҳодиса тафсилотларига аниқлик киритиш ҳамда ҳалок бўлган фуқароларнинг ҳуқуқ ва манфаатларини таъминлаш мақсадида маҳаллий масъул идоралар ва тергов органлари билан зарур алоқалар ўрнатилган.
Вафот этган Ўзбекистон фуқароларининг жасадлари суд-тиббий экспертиза ва зарур расмий жараёнлар якунланганидан сўнг Ватанга қайтарилади.
Россия расмийлари ҳужум Нижнекамскдаги ишлаб чиқариш ва фуқаролик объектларига қаратилганини маълум қилган. Ҳодиса юзасидан Россияда жиноят иши қўзғатилган.
Ҳужум оқибатида ҳалок бўлганлар орасида Тожикистон фуқаролари ҳам борлиги хабар қилинган.
Татаристон раҳбари Рустам Минниханов ҳужум қурбонлари хотирасига мотам эълон қилган.
