ЖЧ вақтида Месси ва Роналдуга суиқасд уюштириш режалаштирилган

 

2026 йилги Жаҳон чемпионати давомида футбол юлдузлари Лионел Месси ва Криштиану Роналдуга қарши турли таҳдидлар қайд этилгани маълум қилинди. Бу ҳақда Маrса нашри хабар берди.

 

Маълумотларга кўра, турнир давомида АҚШ Федерал қидирув бюроси (ФҚБ) ҳамда Халқаро полиция ҳамкорлик маркази (IPСС) футболчилар ва бошқа турнир иштирокчиларига нисбатан хавфсизлик таҳдидларини текширган.

 

Лионел Месси энг кўп таҳдидларга дуч келган футболчилардан бири бўлган. Аргентина терма жамоасининг Иордания ва Мисрга қарши учрашувлари олдидан стадионларга ҳужум қилиш ва футболчини ўлдириш билан боғлиқ таҳдидлар келиб тушган.

 

Хусусан, Аргентина–Иордания учрашуви олдидан Даллас аэропортига номаълум шахс қўнғироқ қилиб, стадионга қурол ва портловчи моддалар билан бостириб кириш ҳамда Мессига ҳужум қилиш билан таҳдид қилган. Аргентина–Миср ўйини олдидан эса ижтимоий тармоқларда Мессига қарши зўравонлик таҳдидлари тарқалган.

 

Шунингдек, стадионлардан бирида портловчи қурилмалар жойлаштирилгани ҳақидаги хабар ҳам келиб тушган. Ҳуқуқ-тартибот идоралари махсус хизмат итлари ёрдамида стадионни текширган, бироқ хабар ёлғон экани аниқланган.

 

Криштиану Роналду билан боғлиқ хавфсизлик ҳолатлари ҳам қайд этилган. FIFА португалиялик футболчининг қаерда яшаётгани ҳақида маълумот олишга уринган шубҳали шахс ҳақида ҳуқуқ-тартибот идораларини хабардор қилган. Кейинчалик у Португалия терма жамоаси жойлашган меҳмонхонада қўлга олинган.

 

Торонтода ҳам Роналдунинг лифтига киришга уринган шахс ушланган. У футболчи билан селфи тушмоқчи бўлганини билдирган.

 

Жаҳон чемпионати давомида ҳакамлар ҳам таҳдидларга дуч келган. Аргентина–Миср учрашувидан кейин франциялик ҳакам Франсуа Летексе шахсий WhatsApp аккаунтига 6 мингдан ортиқ ҳақорат ва таҳдид мазмунидаги хабарлар олган. ВАР ҳаками Вилли Делажод ҳам шунга ўхшаш таҳдидларга дуч келгани айтилмоқда.

 

Мазкур ҳолатлардан сўнг Францияда ҳакамлар ва уларнинг оила аъзолари хавфсизлигини таъминлаш чоралари кучайтирилган.