Жиззахда маст фуқаролар ресторанда ҳисобни тўламай, жанжал кўтарди

 

Жиззах вилояти Фориш туманида профилактика инспекторлари ва фуқаролар иштирокидаги можаро акс этган видео ижтимоий тармоқларда тарқалди. Ҳолат юзасидан Жиззах вилояти ИИБ расмий муносабат билдирди.

 

ИИБ маълумотига кўра, воқеа 5 август куни соат 21:30 ларда Фориш тумани «Оқтепа» МФЙ ҳудудидаги ресторанда содир бўлган.

 

Ресторан ходимлари ИИБга мурожаат қилиб, маст ҳолдаги бир гуруҳ шахслар буюртма қилинган таомлар учун тўлов қилмаётгани, тартиббузарлик содир этаётгани ва жанжал чиқараётганини билдирган.

 

Чақирув асосида воқеа жойига профилактика инспекторлари ҳамда Қўриқлаш бўлими ходимлари етиб борган. Улар томонидан жамоат тартибини тиклаш ва вазиятни барқарорлаштириш чоралари кўрилган.

 

ИИБ маълумотига кўра, тартиббузарлардан бири — муқаддам судланган аёл — ходимларнинг қонуний талабларига бўйсунмай, жанжални давом эттирган. Шу сабабли у белгиланган тартибда тиббий кўрикдан ўтказилиб, мастлик ҳолатидаги шахсларни вақтинча сақлаш ва реабилитация қилиш пунктига — «Хушёрхона»га жойлаштирилган.

 

Тиббий кўрик давомида мазкур фуқаронинг танасида тан жароҳатлари аниқланмаган.

 

Кейинчалик унинг қизлари «Хушёрхона»га келиб, жамоат тартибини бузган. Расмий маълумотга кўра, улар ходимларга нисбатан ҳақоратли сўзлар ишлатган ҳамда уларга тан жароҳати етказишга уринган.

 

Вазият ходимлар томонидан қонунчиликда белгиланган тартибда бартараф этилган. ИИБ ушбу жараёнда фуқароларга нисбатан қўл кишани, резина таёқ ёки электршокер каби махсус воситалар қўлланмаганини маълум қилган.

 

Айни вақтда ҳодисада иштирок этган барча шахсларнинг хатти-ҳаракатларига ҳуқуқий баҳо бериш мақсадида терговга қадар текширув ҳаракатлари олиб борилмоқда.