Швейцария ва Германиянинг Ўзбекистондаги янги элчилари тайинланди
Ташқи ишлар вазири Бахтиёр Саидов Швейцария ва Германиянинг мамлакатдаги янги элчилари Симон Гигер ҳамда Маттиас Фоллертдан ишонч ёрлиқлари нусхаларини қабул қилди.
Ўзбекистон ташқи ишлар вазири Бахтиёр Саидов Швейцариянинг Ўзбекистондаги янги элчиси Симон Гигер ҳамда Германиянинг янги фавқулодда ва мухтор элчиси Маттиас Фоллертдан ишонч ёрлиқлари нусхаларини қабул қилди.
Симон Гигер билан учрашувда Ўзбекистон ва Швейцария ўртасидаги сиёсий мулоқотни фаоллаштириш, савдо-иқтисодий ва инвестициявий ҳамкорликни кенгайтириш, саноат кооперациясини ривожлантириш ҳамда янги қўшма лойиҳаларни илгари суриш масалалари муҳокама қилинди.
Гигер ушбу лавозимда 2021 йилдан бери Ўзбекистонда фаолият юритган Константин Оболенскийнинг ўрнини эгаллади. Оболенский дипломатик миссиясини 2026 йил июнь ойида якунлаган.
Германиянинг янги элчиси Маттиас Фоллерт билан учрашувда эса икки томонлама кун тартибидаги долзарб масалалар муҳокама қилинди. Томонлар олий даражада эришилган келишувларни ўз вақтида ва сифатли амалга ошириш муҳимлигини таъкидлади.
Бахтиёр Саидов Германияни Ўзбекистоннинг Европадаги ишончли ва вақт синовидан ўтган ҳамкорларидан бири сифатида баҳолади. Унинг қайд этишича, сўнгги йилларда юқори даражадаги ташрифлар ва мунтазам сиёсий мулоқотлар туфайли икки мамлакат муносабатлари изчил ривожланмоқда.
Германиянинг Ўзбекистондаги собиқ фавқулодда ва мухтор элчиси Манфред Ҳутерер мамлакатдаги дипломатик миссиясини июль ойида якунлаганди.
