Трамп Эрон таҳдиди сабаб Туркиядан яширинча ҳарбий самолётда учиб кетган
Трамп Туркияга НАТО саммитида қатнашиш учун борганди. Саммит якунида эса Эрон томонидан унга қарши суиқасд таҳдиди аниқланиб, қайтиш режаси ўзгартирилган.
АҚШ президенти Доналд Трамп НАТО саммитидан сўнг Туркиядан Буюк Британияга учиб кетишда Эрондан келган суиқасд таҳдиди сабаб махфий ҳарбий рейсдан фойдаланган. Бу ҳақда Reuters хабар берди.
Хабарларга кўра, Трамп Анқарада журналистлар кўз ўнгида эски Air Force One самолётига чиққан. Бироқ у самолётда учмаган. Президент аэропортнинг кетеринг хизмати машинасида яширинча бошқа жойга олиб чиқилиб, кичикроқ C-32A ҳарбий самолётига ўтказилган.
C-32A Трампни Буюк Британиядаги RAF Mildenhall ҳарбий базасига олиб борган. Бу вақтда журналистлар ва Оқ уйнинг айрим ходимлари президент эски Air Force One бортида деб ҳисоблаган.
Washington Post маълумотига кўра, махфий операцияга Трампга қарши Эрондан келган ишончли таҳдид сабаб бўлган. Эски Air Force One эса президент унда кетаётгандек таассурот уйғотиш учун чалғитувчи самолёт сифатида ишлатилган.
Журналистларга парвоз вақтида самолётнинг пресс-кабинасидаги дераза пардаларини ёпиб туриш тавсия қилинган. Трамп кейинчалик бунинг сабабини самолёт “эҳтимол хавфли парвозда” бўлгани билан изоҳлаган.
Трамп Анқарага НАТО саммити учун Қатар томонидан АҚШга совға қилинган, янгиланган Boeing 747 самолётида келган эди. У саммитдан кейин эски Air Force Онеъда учишини маълум қилган, янги самолёт эса RAF Mildenhall базасига алоҳида йўл олиши керак бўлган.
C-32A Буюк Британияга эски Air Force Онеъдан бир неча дақиқа олдин етиб келган. Трамп кейинчалик яна президент самолётига ўтган ва Вашингтонга йўл олган.
Оқ уй махфий парвоз ҳақидаги хабарларга муносабат билдириб, Қатар томонидан совға қилинган самолёт президент ва унинг ходимлари хавфсизлигини таъминлайдиган юқори даражадаги хавфсизлик протоколлари билан жиҳозланганини маълум қилган.
Оқ уй коммуникациялар директорининг айтишича, АҚШ президентига таҳдид солаётган кўплаб душманлар мавжуд ва бундай таҳдидларга қарши “мавжуд барча воситалар” ишга солинади. Пентагон эса ҳозирча хабарларга изоҳ бермаган.
Қатар томонидан совға қилинган Boeing 747 АҚШга вақтинчалик президент самолёти сифатида фойдаланиш учун мўлжалланган. Самолёт мудофаа пудратчиси L3Harris Technologies томонидан қайта жиҳозланган.
