Ҳиротда БМТнинг икки ходими Толибон разведкаси томонидан ҳибсга олинди
Уларнинг нима сабабдан ҳибсга олингани ва қандай айбловлар қўйилгани ҳақида маълумот берилмаган.
Бирлашган Миллатлар Ташкилотининг Афғонистонга кўмаклашиш миссияси (UNAMA)нинг икки нафар афғон ходими Ҳиротда Толибоннинг разведка хизмати вакиллари томонидан ҳибсга олинди. Бу ҳақда UNAMA Amu телеканалига маълум қилди.
Миссия маълумотига кўра, ходимлар 9 август куни, якшанба куни, амалдаги ҳокимиятнинг Бош разведка бошқармаси вакиллари томонидан ҳибсга олинган.
UNAMA ҳибсга олиш сабаблари ва ходимларга қандай айбловлар қўйилгани ҳақида маълумот берилмаганини билдирди. Шунингдек, миссия вакилларига ҳибсга олинган ходимлар билан учрашишга рухсат берилмаган.
“UNAMA'га уларга қўйилган айбловлар ҳақида маълумот берилмади ва бизга улар билан учрашишга рухсат берилмади”, — дейилади миссия баёнотида.
БМТ миссияси ҳибсга олинган ходимларнинг шахсини ошкор қилмаган ва ҳодисанинг бошқа тафсилотларини ҳам келтирмаган.
UNAMA Толибон расмийларини БМТ ходимларига берилган имтиёз ва иммунитетларга риоя қилишга чақирди.
Ҳозирча Толибоннинг Бош разведка бошқармаси ҳибсга олиш ҳолати бўйича расмий изоҳ бермаган.
