Ливиянинг энг йирик нефтни қайта ишлаш заводига дронлар ҳужум қилди

Ливиянинг Завия шаҳридаги нефть мажмуасига портловчи моддалар ортилган дронлар ҳужум қилди. Ҳужум оқибатида ёқилғи сақлаш иншоотида ёнғин юзага келган. Мамлакат Миллий нефть корпорацияси (НОC) ёнғин тезда назоратга олинганини маълум қилди. Бу ҳақда DW хабар берди.

 

Триполидан ғарбда жойлашган Завия нефть мажмуасида мамлакатнинг энг йирик нефтни қайта ишлаш заводи фаолият юритади.

 

Маълумотларга кўра, душанба куни номаълум кучлар томонидан уюштирилган ҳужумда нефтни қайта ишлаш корхонасига портловчи моддалар ортилган дронлар зарба берган. Ёнғин оқибатида тахминан 4,5 миллион литр бензин сақланган резервуар қулаб тушган.

 

Завод эгаси Брега Petroleum Marketing компанияси ёнғин кутилганидан тезроқ ўчирилганини билдирган. Муҳандислар Reuters агентлигига зарарнинг чекланганини, бироқ корхона фаолияти вақтинча тўхтатилганини маълум қилган.

 

Ливиянинг халқаро тан олинган бош вазири Абдулҳамид Дбайба фуқаролик инфратузилмасига ҳужум “жавобсиз қолмаслиги”ни айтган. Унинг сўзларига кўра, муҳим объектларга дронлар орқали зарба бериш “уюшган ва хавфли ҳаракат” бўлиб, бунга қатъий жавоб қайтариш зарур.

 

Шунингдек, сешанба куни эрта тонгда яна икки дрон Завия электр станциясини нишонга олган. Улардан бири ёнғинга қарши тизимга урилган, бироқ жиддий зарар етказилмаган.

 

Қайд этилишича, ҳужумлар Ливиядаги давомли хавфсизлик муаммолари фонида юз берди. Мамлакат 2011 йилда Муаммар Қаддафий ҳокимиятдан ағдарилганидан буён сиёсий жиҳатдан бўлиниб келмоқда. Триполидаги ҳукумат мамлакат ғарбини, Халифа Ҳафтар бошчилигидаги Ливия Миллий армияси эса шарқий ҳудудлар ва жанубнинг айрим қисмларини назорат қилади.

 

Ҳодиса ортидан Бенғозида ҳам зўравонлик юз берган. Ливия Миллий армияси ҳарбий разведка бошлиғи Фавзи ал-Мансури автомобиль портлаши оқибатида ҳалок бўлганини маълум қилган. Портлаш учун жавобгарлар ҳозирча аниқланмаган.

 

Ливия Африкадаги энг йирик тасдиқланган нефть захираларига эга давлат ҳисобланади. Июнь ойида мамлакатда нефть қазиб олиш ҳажми суткасига 1,44 миллион баррелга етган. Бу 2013 йилдан бери қайд этилган энг юқори кўрсаткич бўлса-да, ҳукуматнинг кунига 2 миллион баррель қазиб олиш мақсадидан паст.