“Россия кемалари мусодара қилинса, жавоб қайтарамиз” – Путин
Россия президенти Европа давлатларини Россия савдо кемаларини қўлга олишдан огоҳлантирди ва бундай ҳолат жавобсиз қолмаслигини айтди.
Россия президенти Владимир Путин Европа давлатлари Россиянинг савдо кемаларини мусодара қиладиган бўлса, Москва бунга жавобан тегишли чоралар кўришини маълум қилди. Бу ҳақда Россиянинг давлат ахборот агентлиги ТАСС хабар берди.
Европа Иттифоқи Россиянинг “соя флоти” деб аталадиган, санкцияларни четлаб ўтишда фойдаланилаётган кемаларига қарши назорат ва босимни кучайтираётган эди. Европа давлатлари санкцияларни бузишда гумон қилинаётган айрим кемаларни текшириш ва ушлаб туриш чораларини ҳам кўрмоқда.
Путин бундай ҳаракатларни “қароқчилик ва бандитизм” деб атади. Унинг айтишича, агар Россия кемаларини қўлга олиш амалиёти ҳақиқатан ҳам бошланса, Москва “жавобан худди шундай чоралар” кўради.
Россия президенти жавоб чоралари фақат Россия кемалари қўлга олинган ҳудуд билан чекланиб қолмаслигини ҳам билдирди. Унинг сўзларига кўра, Россия ўзига маъқул ва зарур деб ҳисоблаган исталган ҳудудда жавоб бериши мумкин.
Путин бу баёнотларни Россиянинг Узоқ Шарқидаги Сахалин оролида ҳарбий машғулотларни кузатаётган вақтида билдирган. У, шунингдек, НАТОнинг Осиё-Тинч океани ва Арктика ҳудудларидаги фаоллиги кучаяётганини танқид қилган.
