Россиялик блогер қозоқларнинг рус тилини билмаслигини танқид қилгани учун Қозоғистондан чиқариб юборилди
Ксения Гузаевага Қозоғистонга 5 йил муддатга кириш тақиқланди.
Қозоғистоннинг Остона шаҳрида россиялик стример ижтимоий тармоқлардаги провокацион ва ноўрин баёнотлари сабаб мамлакатдан чиқариб юборилди. Бу ҳақда Остона шаҳар полиция департаментига таяниб, ТАСС хабар берди.
Полиция хабарига кўра, Г. К. исмли хорижий фуқаро Қозоғистон ҳудудини тарк этган. Аввалроқ суд уни ижтимоий тармоқлардаги провокацион ва ноўрин баёнотлари учун маъмурий жавобгарликка тортган. Унга Қозоғистонга беш йил муддатга кириш тақиқланди.
Маҳаллий ОАВ маълумотларига кўра, гап Fasoollka тахаллуси билан танилган россиялик стример Ксения Гузаева ҳақида кетмоқда. У ижтимоий тармоқлардаги жонли эфирларида, жумладан, Twitch платформасида Павлодар шаҳрининг Қозоғистонга тегишлилигини шубҳа остига қўйган ҳамда маҳаллий аҳолини ҳақорат қилган.
Қозоғистон полицияси қонунларга риоя қилиш ва мамлакатга ҳурмат билан муносабатда бўлиш барча учун мажбурий эканини таъкидлади. Идора стримернинг полициячилар ҳамроҳлигида самолётга чиқаётгани акс этган видеони ҳам эълон қилган.
Қозоғистон қонунчилигига кўра, интернет жамоат жойига тенглаштирилган. Полиция интернет тармоғида доимий мониторинг олиб боради.
