Журналистлар Трампни судга берди
Икки медиа ташкилоти Truth API хизматини тўхтатишни ва Оқ уйнинг расмий баёнотларини фақат ушбу платформа орқали эълон қилишига йўл қўймасликни талаб қилмоқда.
АҚШ президенти Доналд Трамп икки медиа ташкилоти томонидан судга берилди. Даъвогарлар президентнинг Truth Social'даги постларини, жумладан, молия бозорларига таъсир кўрсатиши мумкин бўлган хабарларини бошқалардан олдин олиш имконини берувчи пуллик хизматни тўхтатишни талаб қилмоқда.
Манхеттен федерал судига The Intercept ва Freedom of the Press Foundation томонидан киритилган даъво Trump Media & Technology Group компанияси ишга туширган Truth API хизматига қарши қаратилган.
Ушбу хизмат фойдаланувчиларга Трампнинг ўзи ҳам кирадиган Truth Social'даги 10 та машҳур аккаунт постларини кенг жамоатчиликдан олдин олиш имконини беради. Бунинг учун ойига 100 минг долларгача тўлов ундирилади.
Даъвогарлар мазкур хизмат президентнинг баёнотларига барча учун тенг ва бепул кириш имконияти бўлиши кераклиги ҳақидаги конституциявий тамойилларга зид эканини таъкидламоқда. Шунингдек, улар Трампнинг ўз постларидан молиявий манфаат кўриши манфаатлар тўқнашувини юзага келтиришини билдирган.
Trump Media вакили эса компания хизматини ҳимоя қилиб, Трампнинг баёнотлари бошқа кўплаб платформалар ва ОАВ орқали ҳам тарқатилишини айтди.
Reuters маълумотига кўра, Доналд Трамп Trump Media компаниясининг энг йирик акциядори бўлиб, унинг 41,3 фоизлик улуши тахминан 950 миллион долларга баҳоланмоқда.
