Эмомали Раҳмон Турсунзодада ўзбек мактаби қуришни буюрди

Тожикистон Президенти Эмомали Раҳмон Турсунзода шаҳридаги ўзбек тилида сўзлашувчи аҳоли учун ўзбек тилида таълим бериладиган таълим муассасаларини қуриш ва уларни ўзбек тилидаги дарслик ҳамда ўқув материаллари билан таъминлашни топширди. Бу ҳақда Тожикистон президентининг Турсунзодага ишчи ташрифи давомида маълум қилинди, дея ёзмоқда “Ховар”.

 

Эмомали Раҳмон Турсунзода шаҳридаги 21-сонли умумтаълим муассасасининг очилиш маросимида қатнашиб, қурилиш ишларининг сифатини юқори баҳолади. У масъуллар ва педагогларни таълим ва тарбия сифати ҳамда даражасини оширишга янада масъулият билан ёндашишга чақирди.

 

Президент педагоглар билан суҳбатда замонавий фанларни ривожлантириш, янги техника ва технологиялардан самарали фойдаланиш, шунингдек, табиий, аниқ ва математика фанлари ҳамда хорижий тилларни ўрганишга алоҳида эътибор қаратиш зарурлигини таъкидлади.

 

Ташриф доирасида Турсунзода шаҳрида жами 60 та объект қурилиб, фойдаланишга топширилган. Улар орасида икки сменада 18 минг 200 нафар ўқувчига мўлжалланган 20 та умумтаълим муассасаси, 950 нафар болага мўлжалланган 5 та хусусий мактабгача таълим муассасаси, 4 та саноат корхонаси, 1 та туризм объекти, 5 та хизмат кўрсатиш объекти, 6 та спорт майдончаси, умумий сиғими 5 минг 300 тонна бўлган 3 та замонавий совутиш мажмуаси, 9 та кўп қаватли турар жой биноси, маъмурий ва маданий иншоотлар, Давлат байроғи майдони ҳамда Маданият ва истироҳат боғи бор. Мазкур лойиҳалар натижасида 1 минг 220 та доимий иш ўрни яратилган.

 

Масъул шахсларнинг маълумотига кўра, ҳозирда Турсунзода шаҳрида 132 та умумтаълим муассасаси фаолият юритади. Уларда 78 минг 863 нафардан ортиқ ўқувчи таълим ва тарбия олмоқда.

 

Тожикистон Давлат мустақиллигининг 35 йиллигини муносиб нишонлашга тайёргарлик доирасида Турсунзодада яна 24 та таълим муассасасини қуриш ва фойдаланишга топшириш режалаштирилган. Ҳозиргача улардан 19 та ўқув биноси фойдаланишга топширилган бўлиб, уларнинг умумий сиғими 8 минг 185 ўринни ташкил этади.