Россия Қора денгизда ўт очишни тўхтатиш таклифини рад этди
Москва бундай келишув Киевга вақтинчалик “нафас ростлаш” имконини беришини, ҳозирча мораторий учун асос йўқлигини билдирди.
Россия Қора денгизда Украина билан ўт очишни тўхтатиш бўйича таклифни қўллаб-қувватламади. Москва Киевга вақтинчалик “нафас ростлаш” имконини берадиган келишув учун асос йўқлигини билдирди. Бу ҳақда Reuters хабар берди.
Россия ТИВ матбуот котиби Мария Захарова Украина томонидан Қора денгиздаги фуқаролик кемаларига қарши ҳужумлар амалга оширилаётганини айтиб, буни минтақадаги вазиятни беқарорлаштириш ва можарони чўзишга қаратилган сиёсат сифатида баҳолади.
Захарованинг таъкидлашича, Россия вазият яхшиланаётганига ишора кўрмаяпти. Шу сабабли Москва “ярим чоралар”ни қўллашга асос йўқ, деб ҳисоблайди.
Россия ТИВ вакили бу баёнотни Туркия ташқи ишлар вазири Ҳакан Фиданнинг Қора денгиздаги ҳарбий амалиётларга мораторий жорий этиш бўйича Россия ва Украинага таклифлар юборилгани ҳақидаги сўзларига жавобан билдирди. Захарованинг айтишича, Россия Туркиядан бундай расмий таклиф олмаган.
Аввалроқ Reuters Украина учинчи томон воситачилигида Россияга Қора денгизда фуқаролик нишонларига ҳужумларни икки томон ҳам тўхтатиши бўйича таклиф юборгани ҳақида хабар берган.
Москва, шунингдек, 2022–2023 йилларда Туркия воситачилигида тузилган Қора денгиз дон ташаббусига қайтиш имкониятини ҳам рад этди.
Россия мазкур келишувни бир томонлама деб ҳисоблайди. Битим Россия Украина ва Ғарб келишув шартларини бажармаганини билдирганидан кейин амалда тўхтаган.
Сўнгги ҳафталарда Россия ва Украина Қора денгиздаги тижорий кемаларга қарши ҳужумларни кучайтиргани, бу эса жаҳон бозорида дон нархларининг ошишига сабаб бўлгани қайд этилган.
