Россияда мигрантлар сонига чеклов жорий этиш таклиф қилинди
Шунингдек, мигрантларнинг ишламайдиган ёки ўқимайдиган оила аъзолари учун кириш ва яшаш чекловларини жорий этиш масаласи ҳам кўриб чиқилмоқда.
Россиянинг Либерал-демократик партияси (ЛДПР) мамлакатдаги хорижий фуқаролар сонига чекловлар жорий этишни таклиф қилди.
Давлат Думасининг Хавфсизлик ва коррупцияга қарши кураш қўмитаси раисининг биринчи ўринбосари, ЛДПР фракцияси раҳбариятидаги депутат Андрей Луговойнинг таъкидлашича, Россияда ишлаш ёки ўқиш учун асосга эга бўлмаган мигрантларнинг оила аъзоларининг мамлакатга кириши ва яшашига рухсат берилмаслиги керак.
Унинг сўзларига кўра, Россияга ишлаш учун келган хорижий фуқаролар меҳнат қилиши, ўқиш учун келганлар эса таълим олиши керак.
Луговой Россияда қолаётган мигрантлар сонини босқичма-босқич камайтиришни таклиф қилди. Унинг режасига кўра:
2027 йил охиригача — 5 миллион нафаргача;
2028 йил охиригача — 4 миллион нафаргача;
2030 йилга келиб — 3 миллион нафаргача хорижий фуқаро қолиши керак.
Депутат, шунингдек, ноқонуний яшаш, қонунбузарлик ёки мамлакатда қолиш учун асосларнинг тугаши депортацияга сабаб бўлиши кераклигини таъкидлаган.
Бундан ташқари, қурилиш, савдо, транспорт, қишлоқ хўжалиги ва хорижий ишчи кучи улуши юқори бўлган бошқа соҳаларда мигрантлар учун рухсат этилган ишчи кучи улушини босқичма-босқич камайтириш ва 2030 йилга бориб 10 фоизгача тушириш таклиф қилинган.
Луговойнинг фикрича, иш берувчи хорижий ишчи кучидан фойдаланиш иқтисодиёт учун зарур эканини асослаб бериши керак.
