Трамп Ҳормуз бўғозини АҚШ ҳудуди сифатида эълон қилмоқчи

 

АҚШ президенти Доналд Трамп Ҳормуз бўғозини Қўшма Штатлар ҳудуди сифатида эълон қилиш режаси ҳақида баёнот берди. У Нью-Йорк штати полиция академиясида бўлиб ўтган тадбирда сўзлар экан, стратегик сув йўли ҳозирда АҚШ кучлари назоратида эканини таъкидлаган.

 

Трампнинг баёнотига кўра, АҚШ ҳарбийлари Ҳормуз бўғозидаги вазиятни назорат қилмоқда. Бироқ президент ушбу ҳудудни АҚШ ҳудуди сифатида эълон қилиш ташаббусининг ҳуқуқий ёки амалий тафсилотларига аниқлик киритмаган.

 

Ҳормуз бўғози Эрон ва Уммон оралиғида жойлашган бўлиб, жаҳон энергетика савдосидаги энг муҳим стратегик сув йўлларидан бири ҳисобланади. Ундаги ҳар қандай кескинлик халқаро нефть ва газ бозорларига бевосита таъсир кўрсатиши мумкин.

 

Эрон расмийлари эса АҚШнинг бўғоз устидан назорат ўрнатишига қарши чиқмоқда. Эрон ташқи ишлар вазири ўринбосари Қосим Ғарибободий мамлакати АҚШнинг таҳдидлари ва ҳарбий куч намойишидан ортга чекинмаслигини билдирган.

 

Томонлар ўртасидаги келишмовчилик фонида Ҳормуз бўғозининг кемалар учун очиқлиги ва унинг назорати масаласи халқаро кун тартибидаги муҳим масалалардан бирига айланган.

 

Эрон аввалроқ бўғозни тўлиқ очиш бўйича бир қатор шартларни илгари сурган. Улар қаторида уруш оқибатлари учун компенсация тўлаш ва Эронга нисбатан жорий этилган санкцияларни бекор қилиш талаблари ҳам бор.

 

Трамп эса аввалроқ АҚШ кучлари Ҳормуз бўғозини миналардан тозалаганини маълум қилган. Оқ уй раҳбари Теҳронга нисбатан иқтисодий босимни кучайтириш ҳарбий зарбалардан кўра самаралироқ бўлиши мумкинлигини таъкидлаган.