Украина Россияга юзлаб дронлар билан ҳужум қилди: Wildberries омборида ёнғин чиқди
Ҳужум оқибатида 6 киши ҳалок бўлди. Москва ва бошқа ҳудудлардаги айрим аэропортлар фаолияти чекланди.
Украина 16 август куни Россия ҳудудларига юзлаб дронлар билан ҳужум уюштирди. Россия расмийларига кўра, ҳужумлар оқибатида камида 6 киши ҳалок бўлган. Мазкур ҳужум Киев томонидан уруш бошланганидан буён Россияга қарши амалга оширилган энг йирик ҳаво ҳужумларидан бири бўлган.
Россия Мудофаа вазирлиги бир кеча давомида Украина томонидан учирилган 822 та дрон йўқ қилинганини маълум қилди. Москва мэри Сергей Собяниннинг айтишича, пойтахт томон йўналган қарийб 600 та дрон аниқланган. Уларнинг учдан бири Москва вилояти ҳудудида уриб туширилган.
Москва вилояти губернатори Андрей Воробёвнинг маълум қилишича, Украина дрони хусусий уйга келиб урилиши оқибатида 83 ёшли эркак ҳалок бўлган. Шунингдек, ҳужум оқибатида Россиянинг йирик чакана савдо компанияси Wildberries'га тегишли омборда ёнғин чиққан.
Россия ОАВлари Подолск шаҳрида омбор ҳудудидан кўтарилаётган қалин қора тутун тасвирларини тарқатди.
Бундан ташқари, Ростов вилоятининг учта шаҳри ҳам ҳужумга учраган. Вилоят губернатори Юрий Слюсарнинг маълум қилишича, мазкур ҳужумларда 5 киши ҳалок бўлган.
Россия расмийлари ҳужум оқибатида Москва ва бошқа ҳудудлардаги айрим аэропортлар фаолиятига вақтинчалик чекловлар киритилганини билдирган.
