Венгрияда полшалик сайёҳлар автобуси ағдарилиб, 12 киши ҳалок бўлди
Полиция ҳайдовчи ухлаб қолган бўлиши мумкинлигини билдирган. Ҳайдовчи ҳибсга олинган.
Венгриянинг шарқида полшалик сайёҳларни олиб кетаётган автобус ағдарилиб кетиши оқибатида 12 киши ҳалок бўлди, 37 киши жароҳатланди. Бу ҳақда Al Jazeera хабар берди.
Ҳодиса 16 август куни Мезокерештеш шаҳри яқинидаги М3 автомагистралида содир бўлган. Сербиядан Полшага йўл олган автобусда 57 нафар йўловчи ва икки ҳайдовчи бўлган.
Дастлабки маълумотларга кўра, автобус йўлдан чиқиб, зовурга тушган ва ағдарилган. Полиция ҳайдовчи ухлаб қолган бўлиши мумкинлигини билдирган. Ҳайдовчи ҳибсга олинган.
11 киши воқеа жойида, яна бир киши шифохонада вафот этган. Қутқарувчилар автобус ичида қолиб кетган айрим йўловчиларни деразалар орқали олиб чиқишга мажбур бўлган.
Мазкур ҳалокат Венгрияда 2003 йилдан буён энг кўп қурбонли йўл-транспорт ҳодисаси бўлди. Ўша йили Сиофок шаҳрида поезд немис сайёҳларини олиб кетаётган автобус билан тўқнашиши оқибатида 33 киши ҳалок бўлган.
