Россия ракета зарбаси оқибатида Украинада 10 киши ҳалок бўлди
Ҳужумда Россия томонидан иккита кичик Бандероль қанотли ракетаси қўлланган.
Россиянинг ракета зарбаси Украина шимоли-шарқидаги Харкив вилоятининг Печениги қишлоғига келиб тушди. Ҳужум оқибатида 10 киши ҳалок бўлди, камида 18 киши жароҳатланди. Бу ҳақда Украина Президенти Вoлoдимир Зеленскийга таяниб, Reuters хабар берди.
Унинг сўзларига кўра, зарба қишлоқнинг гавжум марказий қисмига, почта бўлими, дўкон ва кафе жойлашган ҳудудга берилган.
Харкив вилояти губернатори Олеҳ Синегубовнинг маълум қилишича, ҳужум натижасида 10 та хусусий уй, почта бўлими, кафе, бешта дўкон ва 15 та автомобиль зарар кўрган.
Украина Бош прокуратураси дастлабки маълумотларига кўра, ҳужумда Россия томонидан иккита кичик Бандероль қанотли ракетаси қўлланган.
Зеленский Россиянинг ҳужумига жавоб қайтарилишини билдирди. Россия томони эса воқеа юзасидан ҳозирча изоҳ бермаган.
БМТнинг Украинадаги Инсон ҳуқуқларини мониторинг қилиш миссияси ҳужум оқибатлари ва тинч аҳолига етказилган зарар бўйича маълумот тўплаётганини маълум қилди.
Россия ва Украина ўз ҳужумларида тинч аҳолини атайлаб нишонга олганини рад этиб келади.
