Глинка кўчасидаги авария ҳолати юзасидан жиноят иши қўзғатилди

 

Тошкент шаҳар ҳокимлиги Матбуот хизмати Глинка кўчасида юз берган ҳодиса юзасидан қўшимча маълумот берди.

 

Дастлабки маълумотларга кўра, диаметри 219 миллиметр бўлган ерости газ қувуридан сизиб чиққан газ иссиқлик тармоғи камерасида тўпланиши оқибатида авария ҳолати юзага келган.

 

Ўрганишлар давомида газ қувурининг тахминан 375 квадрат сантиметр (15×25 см) майдонида бир нечта жойдан газ сизиб чиқаётгани аниқланган.

 

Айни пайтда тегишли соҳа мутахассислари томонидан ҳодисанинг келиб чиқиш сабаблари ва барча тафсилотлари батафсил ўрганилмоқда. Текширув ишлари якунлангач, шикастланган йўл қопламасини тиклаш ишлари давом эттирилади.

 

Йўл қопламасини тиклаш ишлари якунлангач, Глинка кўчасида транспорт ҳаракати қайта тикланади.

 

Мазкур ҳолат юзасидан жиноят иши қўзғатилган бўлиб, ҳозирда тергов ҳаракатлари олиб борилмоқда. Тергов якунлари бўйича айбдор шахсларнинг хатти-ҳаракатларига қонунчиликда белгиланган тартибда ҳуқуқий баҳо берилади.

 

Ҳодиса оқибатларини бартараф этиш, унинг сабабларини аниқлаш, муҳандислик тармоқларининг ҳолатини ўрганиш ҳамда келгусида бундай ҳолатларнинг олдини олиш масалалари Тошкент шаҳар ҳокимлигининг доимий назоратида эканлиги маълум қилинди.