Шавкат Мирзиёев Жоржа Мелонига мактуб йўллади
Президент Жоржа Мелонини Италия ҳукумати раҳбари лавозимида энг узоқ муддат фаолият юритган ҳукумат раҳбари бўлгани билан табриклади.
Президент Шавкат Мирзиёев Италия Вазирлар Кенгаши Раиси Жоржа Мелонига мактуб йўллади.
Давлат раҳбари Жоржа Мелонини Италия Республикаси Вазирлар Кенгаши Раиси лавозимида шу вақтга қадар энг узоқ муддат фаолият юритган ҳукумат раҳбари сифатида тарихдан муносиб ўрин олгани билан самимий муборакбод этди.
Президент ушбу натижа Жоржа Мелонининг сиёсий иродаси ва қатъияти, давлат бошқарувидаги масъулиятни чуқур ҳис этиши ҳамда Италия халқи томонидан унга билдирилган юксак ишончнинг яққол ифодаси эканини таъкидлади.
Мактубда Италия миллий манфаатларини қатъий ҳимоя қилиш, мамлакатнинг Европа Иттифоқи ва халқаро майдондаги нуфузи ҳамда обрў-эътиборини янада мустаҳкамлаш борасида Жоржа Мелони олиб бораётган саъй-ҳаракатлар алоҳида эътироф этилди.
Шунингдек, Италия Ҳукумати раҳбарининг Ўзбекистонга нисбатан дўстона муносабати ва икки мамлакат ўртасидаги кўп қиррали ҳамкорликни изчил кенгайтиришга қаратаётган доимий эътибори учун миннатдорлик билдирилди.
Ўзбекистон Италия билан ўрнатилган стратегик шериклик муносабатларини юксак қадрлаши қайд этилди. Бугунги кунда сиёсий мулоқот, савдо-иқтисодий ва инвестициявий ҳамкорлик, шунингдек, маданий-гуманитар алоқалар изчил ривожланиб, икки томонлама муносабатлар сифат жиҳатидан янги босқичга кўтарилаётгани таъкидланди.
Мактуб якунида Президент Шавкат Мирзиёев Жоржа Мелонига мустаҳкам соғлик, оилавий бахт-саодат ва масъулиятли давлат фаолиятида улкан муваффақиятлар, дўст Италия халқига эса тинчлик-осойишталик, фаровонлик ва бардавом равнақ тилади.
