EИ давлатлари ноқонуний мигрантларни Европадан ташқаридаги қайтариш марказларига юбормоқчи

Дания, Германия, Австрия, Нидерландия ва Греция 2027 йилгача бошпана олиш ҳақидаги аризаси рад этилган айрим мигрантларни Европа Иттифоқидан ташқарида ташкил этиладиган “қайтариш марказлари”га юбориш тизимини йўлга қўйишни режалаштирмоқда. Беш давлат бу борада умумий моделни ишлаб чиқишга келишиб олди.

 

Бу ҳақда 4 сентябрь куни Копенгагенда бўлиб ўтган беш давлат ички ишлар ва миграция масалалари вазирлари учрашуви якунида маълум қилинди.

 

“Қайтариш марказлари” келиб чиқиш мамлакатига қайтаришнинг имкони бўлмаган ва бошпана сўрови рад этилган мигрантларни жойлаштириш учун мўлжалланади. Бундай марказларни EИга кирмайдиган бир ёки бир нечта ҳамкор давлат ҳудудида ташкил этиш режалаштирилмоқда. Ҳозирча қайси давлатлар билан музокара олиб борилаётгани ошкор қилинмаган.

 

Дания миграция ва интеграция вазири Мортен Бoдсковнинг айтишича, томонлар 2027 йил давомида дастлабки мигрантларни EИ ташқарисидаги ҳамкор давлатга юборишга тайёр бўлишни мақсад қилган.

 

Беш давлат марказларни молиялаштириши, ҳамкор мамлакатларга қўшимча маблағ, тижорий келишувлар ёки бошқа рағбатлантириш чораларини таклиф қилиши мумкин. Тизим EИ қонунчилиги ва халқаро мажбуриятларга мувофиқ равишда, халқаро ташкилотлар билан ҳамкорликда амалга оширилиши режалаштирилмоқда.

 

Ташаббус тарафдорлари янги тизим ноқонуний миграцияни камайтириш ва одам савдоси билан шуғулланувчи гуруҳлар фаолиятига зарба беришга ёрдам беришини таъкидламоқда.

 

Бироқ лойиҳа инсон ҳуқуқлари билан боғлиқ хавотирларни ҳам келтириб чиқармоқда. Ҳуқуқ ҳимоячилари мигрантларни EИ ҳудудидан ташқаридаги марказларга юбориш уларнинг ҳуқуқий ҳимояси ва бошпана олиш имкониятларига салбий таъсир кўрсатиши мумкинлигидан огоҳлантирмоқда.

 

Беш давлат вакиллари сентябрь охирида Мюнхенда яна учрашиб, лойиҳа бўйича музокараларни давом эттиришни режалаштирган.