КХДР Жанубий Корея билан бирлашиш сиёсатига оид бандни бекор қилди
Низомдан Жанубий Корея билан бирлашиш масаласидан ташқари, Жанубий Кореяда жойлашган АҚШ ҳарбий кучлари ҳамда “ташқи кучлар”га оид айрим ҳаволалар ҳам олиб ташланган.
Шимолий Кореяда ҳукмрон Корея Меҳнат партияси ўз низомидан Жанубий Корея билан тинч йўл орқали бирлашиш ҳақидаги бандни олиб ташлади. Низомнинг янгиланган матни илк бор Сеул Миллий хавфсизлик стратегияси институти томонидан эълон қилинди. Бу ҳақда Ёнҳап ахборот агентлиги хабар берди.
Маълум қилинишича, Жанубий Корея разведкаси 2024 йил июнь ойида КХДР ҳукмрон партияси низомига ўзгартиришлар киритилганини билдирган, бироқ ҳужжатнинг тўлиқ матни шу вақтгача жамоатчиликка тақдим этилмаган. Эълон қилинган ҳужжатда, шунингдек, 2026 йил февраль ойида Корея Меҳнат партиясининг IХ съездида қабул қилинган тузатишлар ҳам акс этган.
Янгиланган низомда Шимолий Корея етакчиси Ким Чен Иннинг ваколатлари кенгайтирилган. Шу билан бирга, партиянинг аввалги раҳбарлари Ким Ир Сен ва Ким Чен Ирнинг фаолияти ҳамда ютуқларига оид айрим маълумотлар ҳужжатдан чиқариб ташланган. Мутахассислар буни Ким Чен Иннинг партиядаги ягона ва мутлақ раҳбар сифатидаги мавқеини янада мустаҳкамлашга қаратилган қадам сифатида баҳоламоқда.
Низомдан Жанубий Корея билан бирлашиш масаласидан ташқари, Жанубий Кореяда жойлашган АҚШ ҳарбий кучлари ҳамда “ташқи кучлар”га оид айрим ҳаволалар ҳам олиб ташланган.
Таҳлилчиларга кўра, мазкур ўзгаришлар Пхеняннинг Шимолий ва Жанубий Кореяни алоҳида давлатлар сифатида кўриш позициясини янада кучайтираётганидан далолат беради.
Аввалроқ, 2024 йил октабр ойида Ким Чен Ин ташаббуси билан Жанубий Корея билан тинч йўл орқали бирлашиш ҳақидаги банд КХДР Конституциясидан ҳам чиқариб ташланган эди.
Янгиланган низомда Корея Меҳнат партияси бош котибининг ваколатлари ҳам кенгайтирилган. Жумладан, унга йиғилишлар чақириш, мансабдор шахсларни тайинлаш ва лавозимидан озод этиш, шунингдек, партия бўлимларини тугатиш ваколатлари берилган.
Бундан ташқари, янги қоидаларга кўра, уруш даврида партия ичидаги сайловларни бекор қилиш имконияти ҳам назарда тутилган. Партияга аъзо бўлишнинг энг кам ёши эса 18 ёшдан 20 ёшгача оширилган.
