Шавкат Мирзиёев Хитой делегациясини қабул қилди
Учрашувда Ўзбекистонда Хитойнинг етакчи олий таълим муассасалари филиалларини очиш масаласига алоҳида эътибор қаратилди.
7 сентябрь куни Шавкат Мирзиёев Хитой Коммунистик партияси Марказий қўмитаси Халқаро алоқалар бўлими мудири Лю Хайсин бошчилигидаги Хитой Халқ Республикаси делегациясини қабул қилди.
Учрашувда Лю Хайсин ХХР Раиси Си Цзиньпиннинг Ўзбекистон Президентига самимий саломи ва эзгу тилакларини етказди.
Мулоқот давомида олий даражада эришилган келишувларга мувофиқ, Ўзбекистон ва Хитой ўртасидаги кўп қиррали ҳамкорлик ва амалий шерикликни янада кенгайтириш масалалари муҳокама қилинди.
Сўнгги йилларда икки давлат ўртасидаги барча шароитларда ҳар томонлама стратегик шериклик муносабатлари янги, юқори босқичга кўтарилгани қайд этилди.
Ўзаро товар айирбошлаш ва инвестициялар ҳажми изчил ошиб бораётгани, Хитойнинг етакчи компаниялари иштирокидаги қўшма лойиҳалар ва корхоналар сони ортаётгани таъкидланди.
Учрашувда, шунингдек, парламентлараро ва партиялараро алоқаларни мустаҳкамлаш, олий ва касбий таълим соҳасидаги ҳамкорликни ривожлантириш масалаларига алоҳида эътибор қаратилди. Хитойнинг етакчи олий таълим муассасалари филиалларини Ўзбекистонда очиш муҳимлиги қайд этилди.
Томонлар парламентлараро ва партиялараро ҳамкорликни кенгайтириш бўйича қўшма “йўл харитаси”ни қабул қилишга келишиб олдилар.
