Шавкат Мирзиёев Жаҳон божхона ташкилоти бош котибини қабул қилди
Учрашувда божхона маъмуриятчилигини такомиллаштириш, тизимни рақамлаштириш ва халқаро ҳамкорликни кенгайтириш масалалари муҳокама қилинди.
Шавкат Мирзиёев 7 сентябрь куни Тошкентда еттинчи Глобал кинология форумида иштирок этиш доирасида Ўзбекистонда бўлиб турган Жаҳон божхона ташкилоти бош котиби Ян Сондерсни қабул қилди.
Учрашувда божхона маъмуриятчилигини такомиллаштириш, божхона органлари салоҳиятини мустаҳкамлаш ҳамда ҳуқуқбузарликларга қарши курашиш борасидаги амалий ҳамкорликни янада кенгайтириш масалалари муҳокама қилинди.
Ўзбекистонда божхона соҳасида амалга оширилаётган ислоҳотлар натижасида экспорт юкларининг 94 фоизи, импорт юкларининг эса 87 фоизи соддалаштирилган тартибда расмийлаштирилаётгани қайд этилди. Декларацияларни расмийлаштириш вақти 20 дақиқагача қисқартирилган.
Томонлар божхона тартиб-таомилларини янада рақамлаштириш ва уйғунлаштириш, норматив-ҳуқуқий базани такомиллаштириш, шунингдек, божхона органлари ходимларини ўқитиш ва малакасини ошириш масалаларига алоҳида эътибор қаратдилар.
Мамлакатимизнинг Жаҳон савдо ташкилотига аъзо бўлишга тайёргарлиги доирасида божхона тизимини халқаро стандартларга мувофиқлаштириш муҳимлиги таъкидланди.
Учрашув якунида ҳамкорликни янада чуқурлаштириш ва божхона маъмуриятчилигини такомиллаштиришга қаратилган аниқ чора-тадбирларни ўз ичига олувчи “йўл харитаси”ни ишлаб чиқиш ва қабул қилиш бўйича келишувга эришилди.
