Ўзбекистон Президенти шарафига Сербияда расмий қабул маросими бўлиб ўтди
Ташриф шарафига “Кула Белград” биноси Ўзбекистон байроғи рангларида ёритилди.
Шавкат Мирзиёев рафиқаси билан бирга Белград шаҳрида Ўзбекистон давлат раҳбарининг Сербияга ташрифи муносабати билан ташкил этилган расмий қабул маросимида иштирок этди.
Олий мартабали меҳмонларни Сербия Президенти Александр Вучич, Биринчи хоним Тамара Вучич, Халқ мажлиси Раиси Ана Брнабич, Бош вазир Дуро Матсут ва бошқа расмий шахслар кутиб олди.
Тадбирда Ўзбекистон Президентининг Сербияга илк расмий ташрифи икки мамлакат ўртасидаги муносабатларни янги босқичга олиб чиқиши, ўзаро манфаатли ҳамкорликни янада кенгайтириш ва мустаҳкамлаш учун янги имкониятлар очаётгани таъкидланди.
Шунингдек, Ўзбекистон ва Сербия халқлари ўртасидаги дўстона алоқалар изчил ривожланиб бораётгани қайд этилди.
Ўзбекистон делегациясининг ташрифи шарафига Белграддаги “Кула Белград” осмонўпар биноси Ўзбекистон Республикаси давлат байроғи рангларида ёритилди.
