Глинкадаги портлашдан кейин “навбат” яна 10 та газ қувурларига келди
Ҳодисадан сўнг Тошкентнинг бошқа ҳудудларидаги газ тармоқларини текшириш учун махсус ишчи гуруҳ тузилди.
Тошкент шаҳрининг Глинка кўчасида ер ости газ қувуридан сизиб чиққан газ оқибатида юзага келган чақнашдан сўнг пойтахт ҳудудидаги газ тармоқларини қўшимча текшириш ишлари олиб борилмоқда.
Тошкент шаҳар ҳокимлиги матбуот хизматининг маълум қилишича, 3 сентябрь куни Глинка кўчасида содир бўлган ҳодисадан кейин Тошкент шаҳар ҳокимлиги топшириғига асосан махсус ишчи гуруҳ ташкил этилган. Унга “Veolia Energy Tashkent”, “Тошкент шаҳар сув таъминоти”, “Ҳудудгаз Пойтахт” ҳамда туман газ таъминоти бўлимларининг тажрибали мутахассислари жалб қилинган.
Текширувлар давомида бугунги кунга қадар ўрта босимли газ қувурларида 4 та, паст босимли қувурларда эса 6 та газ сизиши ҳолати аниқланган. Барча носозликлар тезкор равишда бартараф этилган.
Айни пайтда “Ҳудудгазтаъминот” АЖ ва бошқа мутасадди ташкилотларнинг мобил лабораториялари томонидан кўчага туташ ҳудудлардаги муҳандислик тармоқлари ҳам комплекс текширувдан ўтказилмоқда.
Шунингдек, Глинка кўчасида таъмирлаш ва тиклаш ишлари якунланган. Йўл автомобиль ҳаракати учун тўлиқ очилган.
Текширув ва профилактика ишлари пойтахтда юзага келиши мумкин бўлган авария ҳолатларининг олдини олиш, аҳоли хавфсизлигини таъминлаш ҳамда муҳандислик инфратузилмасининг барқарор ишлашини таъминлашга қаратилган.
