Олмазорда 400 ўринли техникум ва янги касб-ҳунар маркази ташкил этилади
Шунингдек, хорижда ишлаш учун фуқароларни мақсадли тайёрлаш йўлга қўйилади.
Олмазор туманида меҳнат бозори талаби ва кадрлар тайёрлаш тизимини уйғунлаштириш мақсадида янги таълим ва касбга ўқитиш марказлари ташкил этилади. Бу ҳақда Президент Шавкат Мирзиёев раислигидаги видеоселектор йиғилишида маълум қилинди.
Қайд этилишича, бугунги кунда тумандаги иш берувчиларга 4 мингдан зиёд ўрта махсус маълумотли ҳамда қарийб 1 минг нафар махсус маълумот талаб этилмайдиган йўналишларда ишчи кучи керак.
Шу сабабли Олмазор касбий кўникмалар маркази негизида ахборот технологиялари ва илғор инновациялар бўйича 400 ўринли техникум ташкил этилади. Шунингдек, собиқ Тошкент архитектура-қурилиш коллежи биносида замонавий касб-ҳунар маркази очилади. Бошқа мавжуд бинолардан ҳам аҳолини касбга ўқитиш учун самарали фойдаланиш белгиланди.
Хорижда ишлаш истагидаги фуқароларни мақсадли тайёрлаш учун Германиянинг хусусий ўқув марказлари билан ҳамкорликда 500 кишига мўлжалланган немис тили курслари ташкил этилади.
Шунингдек, Чехия ва Словакия меҳнат бозори учун тиббиёт ходимларини тайёрлаш режалаштирилган.
Бундан ташқари, Германия, Япония, Корея ва Буюк Британиядан 20 та йирик рекрутинг компанияси жалб қилинади. Франция компаниялари билан ҳамкорликда эса йилига 1,5 минг нафар фуқарони мавсумий ишларга жойлаштириш бўйича лойиҳалар амалга оширилади.
Ёшлар шаҳарчасида 42 гектар майдонда IT-парк, юқори технологияли саноат ва таълим объектларини бирлаштирган инновацион кластер ташкил этиш ишлари ҳам йил якунига қадар бошланади.
