Тошкентда тадбиркорлар учун гаровсиз кредит лимити 200 млн сўмгача оширилади

Тошкент шаҳрида бизнес бошламоқчи бўлган тадбиркорлар учун гаровсиз кредит лимити 100 миллион сўмдан 200 миллион сўмга оширилади. Бу ҳақда Президент Шавкат Мирзиёев раислигидаги видеоселектор йиғилишида маълум қилинди.

 

Йиғилишда маҳаллаларда кичик бизнес ва хизматлар соҳасини ривожлантириш, тадбиркорлар учун янги имкониятлардан самарали фойдаланиш зарурлиги таъкидланди.

 

Шунингдек, кўп квартирали уйларнинг биринчи қаватларини савдо ва сервис фаолиятига мослаштириш имкониятларини кенгайтириш вазифаси белгиланди.

 

Олмазор туманида мазкур имкониятлардан фойдаланиб, жорий йилнинг ўзида 300 нафар янги тадбиркорни қўллаб-қувватлаш ва 1 мингта иш ўрни яратиш режалаштирилган. Ушбу тажрибани пойтахтнинг бошқа туманларига ҳам кенгайтириб, йил якунигача 20 минг нафар аҳолини даромадли иш билан таъминлаш вазифаси қўйилди.

 

Йиғилишда Мискин ва Иброҳим ота маҳаллалари ҳудудидаги 305 гектарлик саноат зонасининг салоҳияти ҳам кўриб чиқилди. Ҳозир бу ерда 504 та тадбиркорлик объекти фаолият юритмоқда. Уларнинг аксарияти бир-икки қаватли биноларда жойлашгани сабабли ҳудуднинг иқтисодий имкониятларидан тўлиқ фойдаланилмаётгани қайд этилди.

 

Саноат зонасида иш ўринлари сонини ҳозирги 35 мингдан 100 мингтагача, экспорт ҳажмини эса 600 миллион долларгача етказиш имконияти мавжуд.

 

Бунинг учун тадбиркорларга саноат ипотекаси, кредит ва лизинг каби молиявий инструментларни таклиф этиш ҳамда саноат ҳудудида юқори қўшилган қиймат яратадиган янги лойиҳаларни бошлаш белгиланди.