Тошкентдаги 400 та маҳаллани обод қилиш учун 10 трлн сўмлик дастур ишлаб чиқилади
Пойтахтнинг Эски шаҳар ҳудудини комплекс ривожлантириш учун 1 ноябрга қадар ягона концепция ва аниқ лойиҳалар портфели ишлаб чиқилади.
Тошкент шаҳридаги 400 та маҳаллани “Қичқириқ” маҳалласи намунаси асосида обод қилиш бўйича 4 йиллик, 10 триллион сўмлик дастур ишлаб чиқилади. Бу ҳақда Президент Шавкат Мирзиёев раислигидаги видеоселектор йиғилишида маълум қилинди.
Йиғилишда Олмазор туманида маҳалла ва кўчаларни комплекс ривожлантириш бўйича амалга оширилган ишлар ҳам кўриб чиқилди. Йил бошидан тумандаги 9 та кўча бизнес, аҳоли ва сайёҳлар учун жозибадор ҳудудга айлантирилган.
Хусусан, Қичқириқ маҳалласида қисқа вақт ичида 450 ўринли боғча, спорт майдончалари, сайилгоҳ, амфитеатр, пиёдалар йўлаклари ва фавворалар барпо этилди. Натижада 5,5 минг нафар аҳоли учун яшаш ва дам олиш шароитлари яхшиланди.
Мазкур тажрибани кенгайтириб, Олмазорда яна 8 та, пойтахтнинг қолган 11 та туманида эса камида 3–4 тадан кўчада шу каби ишларни бошлаш белгиланди.
Шунингдек, Тошкент шаҳридаги 100 та кўчани комплекс янгилаш учун 1 триллион сўм ажратилган.
Ҳар бир туманда қайси кўча ва маҳаллада, қачон ва қандай ўзгаришлар амалга оширилиши аниқ белгиланиб, бу режалар маҳаллий кенгашларда муҳокама қилиниши ва аҳолига очиқ эълон қилиниши кераклиги таъкидланди.
Йиғилишда пойтахтнинг тарихий қисми — Эски шаҳар ҳудудини комплекс ривожлантириш масаласи ҳам муҳокама қилинди. Хорижий компанияларни жалб қилган ҳолда 1 ноябрга қадар ҳудудни ривожлантириш бўйича ягона концепция ва аниқ лойиҳалар портфелини ишлаб чиқиш топширилди.
Бундан ташқари, Тошкентдаги давлат идораларига тегишли бинолардан самарали фойдаланиш масаласига эътибор қаратилди. Ҳозир пойтахтда умумий майдони 765 минг квадрат метр бўлган 497 та маъмурий бино мавжуд.
Давлат ташкилотларини мақбул жойлаштириш, бўш ва самарасиз фойдаланилаётган майдонларда савдо, сервис, хусусий тиббиёт ва таълим хизматларини йўлга қўйиш зарурлиги қайд этилди.
Масъулларга давлат идоралари биноларини хатловдан ўтказиб, мақбул майдонларни тадбиркорларга кафолатли шартларда узоқ муддатли ижарага бериш бўйича амалий ишларни ташкил этиш топширилди.
