Индонезияда йўловчи кемаси ағдарилди: 100 дан ортиқ одам бедарак йўқолди
Ҳодиса оқибатида 6 киши ҳалок бўлган, 107 киши қутқарилган.
Индонезияда 243 киши бўлган йўловчи кемаси Ява денгизида ағдарилиб кетди. Ҳодиса оқибатида 6 киши ҳалок бўлган, 107 киши қутқарилган, яна 130 киши бедарак йўқолган.
Басарнас қидирув-қутқарув агентлиги маълумотига кўра, “Вирго Transport 8” кемасида 213 нафар йўловчи ва 30 нафар экипаж аъзоси бўлган. Кема шанба куни Сурабаядан Банжармасинга йўл олган ва якшанба тонгида оператори билан алоқани узган.
Қутқарув ишлари давом этмоқда. Ҳудудда қутқарув кемалари ва вертолётлар жалб қилинган. Бироқ баландлиги 2,5 метрга етаётган тўлқинлар операцияни қийинлаштирмоқда.
Расмийлар ҳодисага ноқулай об-ҳаво сабаб бўлган бўлиши мумкинлигини билдирган. Айни пайтда кеманинг чўкиш сабаблари, жумладан, техник носозлик эҳтимоли ҳам текширилмоқда.
