«Шарқ-Ғарб» нефть қувури ёпиқ: Саудия Арабистони Европага нефть етказиб беришни вақтинча тўхтатади
Мазкур ҳолат айрим мижозларни муқобил етказиб бериш манбаларини излашга ундаган.
Saudi Aramco компанияси камида иккита Европа нефтни қайта ишлаш заводига келаси ой Саудия нефти етказиб берилмаслигини маълум қилган. Бунга мамлакатнинг Қизил денгизга олиб борувчи муҳим нефть қувурига қилинган дрон ҳужуми сабаб бўлган.
Bloomberg манбаларига кўра, Саудия нефтини узоқ муддатли шартномалар асосида мунтазам оладиган Европадаги барча харидорларга келаси ой етказиб бериш амалга оширилмайди.
Маълум қилинишича, Саудия Арабистони ўтган ҳафта дронлар ҳужуми ортидан «Шарқ-Ғарб» нефть қувурини ёпган. Манба қувур фаолияти бир неча кун ичида қисман тикланиши, тўлиқ ишга тушиши эса олти ҳафтагача вақт олиши мумкинлигини билдирган.
Европадаги нефтни қайта ишлаш заводлари Саудия нефтини асосан Мисрнинг Сиди-Керир порти орқали олади. Мазкур порт Қизил денгиз билан нефть қувури орқали боғланган.
Нефть қувурининг тўхтатилиши айрим Aramco мижозларини муқобил етказиб бериш манбаларини излашга ундаган. Хусусан, Польшанинг Orlen компанияси жума кунидан буён нефть етказиб бериш бўйича ўндан ортиқ тендер эълон қилган.
