Ишга юбориш ва “Умра” ваъдаси: икки ҳудудда фирибгарлик ҳолатлари аниқланди
Наманганда икки фуқарони Хорватияга ишга юбориш, Фарғонада эса икки кишини “Умра” зиёратига юбориш эвазига пул талаб қилган шахслар ушланди.
Наманган ва Фарғона вилоятларида фуқароларни хорижга ишга юбориш ҳамда «Умра» зиёратини ташкил этиш ваъдаси билан пул талаб қилган шахслар фош этилди.
Жумладан, Наманган шаҳрида яшовчи, 2004 йилда туғилган шахс Тўрақўрғон туманида истиқомат қилувчи икки фуқаронинг ишончига кириб, уларни танишлари ёрдамида Хорватияга ишга юборишни ваъда қилган. Бунинг эвазига у улардан 3600 АҚШ доллари талаб қилган.
Давлат хавфсизлик хизмати ва Иқтисодий жиноятларга қарши курашиш департаменти ходимлари ҳамкорлигида ўтказилган тезкор тадбир давомида мазкур шахс олдиндан 1000 АҚШ доллари олаётган вақтида ашёвий далиллар билан ушланган.
Яна бир ҳолат Фарғона вилоятининг Бувайда туманида қайд этилган. 1969 йилда туғилган шахс тегишли ваколатга эга бўлмаган ҳолда икки нафар маҳаллий фуқарони Саудия Арабистонига «Умра» зиёратига юборишни ваъда қилиб, бунинг эвазига 2200 АҚШ доллари олган.
ДХХ ва ИИБ ходимлари томонидан ўтказилган тадбир давомида унинг ноқонуний ҳаракатларига чек қўйилган.
Ҳозирда ҳар икки ҳолат юзасидан Жиноят кодексининг 168-моддаси (фирибгарлик) билан жиноят ишлари қўзғатилган. Тергов ҳаракатлари давом эттирилмоқда.
