Франция Саудия Арабистонига нефть портини ҳимоя қилиш учун қўшин юборади — Макрон
Янбу портига ҳарбий хизматчилар билан бирга радарлар ва мудофаа тизимлари ҳам жойлаштирилади.
Франция Саудия Арабистонининг ғарбий соҳилидаги Янбу портини ҳимоя қилиш учун ҳарбий хизматчилар, радарлар ва мудофаа тизимларини юборади. Бу ҳақда Франция президенти Эммануэль Макрон маълум қилди.
Макроннинг айтишича, Франция бу масалани Саудия Арабистони билан келишган. У юбориладиган кучлар ҳеч қандай можарога аралашмаслигини, фақат Янбудаги объектларни ҳимоя қилишини таъкидлаган.
Франция президенти бу чоралар нефть бозоридаги кескинликни юмшатишга ҳам ёрдам беришини билдирган.
Маълумот ўрнида. Яман ҳусийлари сўнгги кунларда Саудия Арабистонидаги нефть объектлари, жумладан, Янбудаги Saudi Aramco иншоотларини ракета ва дронлар билан нишонга олганини маълум қилган. Саудия томони эса Янбу ва Тoиф йўналишида учирилган олтита баллистик ракета тутиб қолинганини билдирган.
Янбу Қизил денгиз соҳилидаги Саудия Арабистонининг хом нефть экспорти учун асосий портларидан бири ҳисобланади. Порт Яқин Шарқдаги уруш ва Ҳормуз бўғози орқали кемалар қатновидаги узилишлар фонида алоҳида аҳамият касб этмоқда.
