Украинага 6,6 миллиард евро ажратилади: EИ шартларни келишиб олди
Европа Тинчлик жамғармасидан ажратиладиган маблағ уч йўналишда тақсимланади.
Европа Иттифоқига аъзо давлатлар Украинага Европа Тинчлик жамғармасидан 6,6 миллиард евро ажратиш шартлари бўйича келишиб олди. Маблағлар ҳарбий ёрдам ва тегишли харажатларни молиялаштиришга йўналтирилади.
Бу ҳақда EИнинг ташқи ишлар ва хавфсизлик сиёсати бўйича олий вакили Кая Каллас маълум қилди.
Келишувга кўра, 900 миллион евро Украинага ҳарбий ёрдам кўрсатиш бўйича EИ миссиясини молиялаштиришга йўналтирилади. Яна 1 миллиард евро янги қўшма ускуналар харидига сарфланади.
Қолган 4,7 миллиард евро эса EИга аъзо давлатларнинг харажатларини қоплаш учун ажратилади. Калласнинг билдиришича, айрим давлатлар ўз улушини Украина эҳтиёжларига йўналтиришини маълум қилган.
Каллас бу қарорни Украина учун яхши, Россия учун эса ёмон янгилик деб атаган. Унинг таъкидлашича, Россиянинг гибрид ҳужумлари Европани Украинани қўллаб-қувватлашни камайтиришга ундашга қаратилган, бироқ Европа бунинг аксини қилмоқда.
Аввалроқ EИ расмийлари Европа Тинчлик жамғармасида блокланган 6,6 миллиард еврони қандай йўналтириш масаласини муҳокама қилаётганини билдирган эди.
