Энди навбат АҚШга: Нью-Йоркда фавқулодда ҳолат эълон қилинди
Штатда йил бошидан буён қизамиқнинг 108 та ҳолати қайд этилган.
АҚШнинг Нью-Йорк штатида қизамиқ эпидемияси тарқалиши сабаб штат бўйлаб фавқулодда ҳолат эълон қилинди. Бу ҳақда Reuters хабар берди.
Нью-Йорк губернатори Кети Хочулнинг маълум қилишича, 3 октябрь ҳолатига кўра, штатда қизамиқнинг 108 та ҳолати тасдиқланган. Уларнинг еттитаси Нью-Йорк шаҳрида, 101 таси эса штатнинг бошқа ҳудудларида қайд этилган.
15 июлдан буён 18 та округдаги етарлича эмланмаган қишлоқ жамоаларида 92 та ҳолат аниқланган. Шу давр мобайнида маҳаллий соғлиқни сақлаш бошқармалари қишлоқ ҳудудларида қизамиқ, тепки ва қизилчага қарши ММР вакцинасининг 1 мингдан ортиқ дозасини юборган.
Фавқулодда ҳолат доирасида қизамиққа қарши эмлашни амалга ошириши мумкин бўлган тиббиёт ходимлари доираси кенгайтирилади. Жумладан, парамедиклар, фармацевтлар, доялар ва бошқа тегишли тиббиёт мутахассисларига вакцина юбориш ваколати берилади.
Шунингдек, ҳамширалар шифокорлар билан бир қаторда қизамиқ билан касалланганликда гумон қилинган шахслар учун тестларни буюриши мумкин бўлади. Барча ММР эмлашлари ҳақидаги маълумотлар 72 соат ичида штат ёки Нью-Йорк шаҳри эмлаш регистрларига киритилиши талаб этилади.
Губернатор Кети Хочул қизамиқнинг эмлаш орқали олдини олиш мумкин бўлган касаллик эканини таъкидлаб, штатдаги эпидемияга қарши чораларни кучайтириш мақсадида фавқулодда ҳолат эълон қилганини билдирган.
Фавқулодда ҳолат 5 октябрдан кучга кирган ва 4 ноябргача амал қилади.
